InselAir solucionando problemanan di retraso

ORANJESTAD - InselAir ta solucionando su problemanan di retraso. CEO di InselAir Aruba Frederick Nuboer a splica NoticiaCla.com cu Directie Luchtvaart na Corsou a bay di acuerdo pa otorga licensianan pa pilotonan cu ta bin bula na Corsou, sin cu tin tur e cantidad di rekisito manera pasa un examen 'di nobo'. Algo cu prome e no kier a haci, creando un ambiente no atractivo pa InselAir atrae pilotonan di afo. Esey ta pone cu awor por haya pilotonan di afor mucho mas lihe, cu ta elimina e problema di escases di piloto, un di e problemanan pa e 'retrasonan'. Lo dura un periodo chikito si prome cu e pilotonan aki ta cla pa nan cuminsa bula. 

FALTA AINDA 

Segun Nuboer, e problema no ta completamente soluciona, pero ela bira menos. Pa e biahero di Aruba, e no ta sinti mucho diferencia entre InselAir Aruba y InselAir International (Corsou) mirando cu e lazo entre e dos companianan ta hopi grandi cu ta pone cu durante cualkier 'gap' di buelo, un ta yuda e otro pa por bula. "Bo ta mira vooral e Fokker 70 na e momento aki ta opera den nos region. Nos MD80 tur ta bulando na Miami awor pa Cuba. Esey kiermen cu un pasahero di Aruba bula bay Corsou, ta hay'e den un Fokker 70, pasobra InselAruba ta yudando esun di Corsou. E mes no ta sinti e diferencia.  E CEO di Aruba ta sinti cu e problema di retraso ta riba un bon caminda pa wordo soluciona, y ta papia cu e problema ta 30% soluciona, y ta bay soluciona e resto awor. E lo dura por lo menos 2 luna y mey pa nan ta cualifica pa ta riba liña pa bula den e operacion di InselAir. Esey ta nifica cu tin retraso ainda, pero ta solucionando e problema cu tabata ocasiona e retrasonan aki. "Corectamente" Nuboer a confirma. 

REORGANISACION

E compania di Aruba a pasa den un reorganisacion, unda cu a mira tur nan gastonan durante un periodo di dos siman, unda cu a mira kico tin cu haci. "E parti di entrada tabatin problema cu Venezuela. For di Aruba a corta tur buelo pa Venezuela, mientras cu for di Corsou tabatin un dependencia di 35% ainda. Esey a keda baha te na 3%. E avionan ey cu no ta bula pa e destinacionan ey mas, ta wordo uza awo pa bula rutanan mas lucrativo y unda cu tabatin mas demanda. "Eynan nos a wak un increase den entrada" Nuboer a sigui bisa. Pero tin e gastonan cu tin cu sigui mehora. "Nos a haci un ehercicio riba esey y tin'e bou di control aworaki pa implementa"

RUTA LUCRATIVO

InselAir Aruba no kier papia di un ruta mas lucrativo compara cu otro. Si compara e rutanan, ta mira cu un di nan ta esun pa Quito Ecuador, cu por crece grandemente. Aki a haci cambio den e proceso di benta pa Ecuador, y el a duna su fruta. Nuboer ta mira cu ey ta loke ta bay ta grandi. Un otro destinacion cu ta grandi, ta Paramaribo, cu ta wordo bula. Y esey ta traduci den 8 pa 9 biaha pa siman depende si ta di Aruba y Corsou. Pues tin diferente ruta cu ta lucrativo. InselAir ta cumpliendo 10 aña y ta meymey di un campaña promocional pa su clientenan.