City Suites a kibra tur expectativa pa un hotel den Punda

WILLEMSTAD - Esnan cu mira e hotel 'City Suites' na Pietermaai den centro di Punda na Corsou den prome instante, no por kere cu esaki tabata e mesun sitio unda cu,- entre otro pa hopi aña -, e ruina conoci como 'monster van Pietermaai' tabata ubica. E edificio no acaba cu a bira e 'monster' of e ruina, awe ta un lugar di parkeer moderno y riba dje un edificio cu antes tabata hospta oficina di di gobierno. Awe e ta e 'business hotel' mas nobo na Corsou. For di november di aña pasa e hotel ta den operacion y cu e veterano hotelero Emmy Rosaria na cabes como gerente general. Pa un hotel di 31 suites, maneha pa apenas 7 persona total, logra loke City Suites a logra den apenas 9 luna, ta nada menos cu impresionante. 

Pasobra e ta un hotel den centro di cuidad manera Willemstad,- of den e caso aki, curason di Punda -, hopi hende inicialmente (taba)tin miedo di e ubicacion. Mas pa e parti di seguridad. "Bo ta tende cu den ciudad hopi biaha ta peligroso. Pero esey no ta loke nos tin" Rosaria a bisa. Den e ultimo 6 luna e mensahe ta cla cu e hotel ta uno hopi 'safe' y cu e clientenan mes ta sinti nan mes hopi safe. Rosaria ta mustra tambe riba e hecho cu anochi laat hopi cliente ta sinta pafo riba e teras cu ta letterlijk 'hartje Punda', y cu esey ta dunabo e satisfaccion cu e mensahe ta clear, esta cu e lugar ta safe. 

E mercadeo pa e hotel ta dirigi pa tur hende cu kier hospeda na e hotel, pero nan ta hayando mas y mas cliente comerciante cu no ta en busca di e pool of mucho entertainment, sino ta mas bien esnan cu ta bin, drumi y bay traha y bolbe nan destinacion. "Pero nos tin leisure tambe cu ta hendenan cu ta bin cu vacantie cu no kier huur un auto, no ta durf di core na Corsou etc. Algo hopi bon pa nan pasobra nan ta baha den stad" Rosaria a sigui splica. Esey ta nifica cu nan no mester tin e gastonan extra di transporte cu ta yuda cu e 'budget', cu cual por haci porta mas compras. Tin un lama na Marichi (cerca di e hotel), pero e doño di e hotel (Randy Neuman) no a haya e permit necesario 'ainda' pa bisti e beach den un forma pa e ta mas atractivo. E reparticion pa loke ta e cantidad di clientela, manera por spera, logicamente ta domina den e parti comercial, esta 70% cliente comercial y 30% cliente leisure. Di e grupo total aki, esun di mas grandi ta di Merca, Colombia, Venezuela y Panama cu ta bin traha pa companianan grandi.  E ta parti entre Latino America y Merca, y pa leisure, hopi di Aruba y Bonaire. 

Situa den ciudad, ta trece e parti di seguridad cu ne. Y aki tambe City Suites a pensa ariba y tin e solucion. "Bo mester tin bo yabi pa bo drenta e gang pa bo yega bo camber (di hotel) " Rosaria ta splica. Sin esey, ta imposibel bo subi e gang. Esey ta trece un sentido di seguridad pa e cliente cu sa cu no ta asina asina un hende 'straño' por subi riba e pisonan. Esey ta conta tambe pa esnan cu tin auto di huur, pa nan tin aceso na e garashi di e hotel pa por activa e parti ey tambe. Tin seguridad tambe rond, cu ta duna e cliente di hotel mas miho ainda. E feedback cu e hotel ta hayando, ta hopi bon. "E unico cos cu hende no ta gusta, ta cu si tin un hende ta bin bishitabo, e tin cu pasa den lobby prome cu e pasa pa e persona su camber. Tin hende cu kier e privacy pa e hende por subi su camber sin sa ken a bishit'e. Pero esey por traha otro tambe" Rosaria a splica. "Uno kier e asina, y otronan no". Si tabatin cualkier duda cu nan sistema di seguridad no ta traha of si, por a deduci di un bishita cu e hotel tabatin di un grupo grandi di instancia di seguridad. "Si nos a pasa nan screening di Merca, esey kiermen cu e hotel ta safe". 

Loke ta diferencia e hotel di tur otro, ta e trato personal. "E hotel ta hopi chikito. Nos tin 31 suites so, y esey ta pone cu nos conoce tur e caranan, y tur hende. Tur ta suites. Nos no tin hotel camber regular" Rosaria a bisa. E plan ta pa habri 11 mas cu ta e piso 1, cu no ta habri pa benta ainda. Y si tabatin cualkier duda cu e ta un hotel chikito, e cantidad hopi limita di personal ta confirma esey. "E personal ta di train pa duna tur informacion di Corsou, pasobra obviamente ta un hotel so, sin actividad" Rosaria a bisa, pues mester sa kico tur ta pafo pa por duna e huesped e posibilidad aki. Tin restaurant rond di e area, un total di 5 den e edificio, aunke e no ta e restaurant di e hotel. Loke cu a haci e hotel exitoso y cu por sinti, ta cu hopi huesped ya caba a considera e propiedad di tal forma cu nan a cuminsa bin bek, esta cu e hotel a cuminsa disfruta di e 'return visitors'. Un señal cu e hotel tin su marca caba den mercado.