Pin cu a kibra na WEB a causa e blackout total fin di juli

ORANJESTAD - E problema cu a causa e blackout fin di juli, tabata debi na fayo di un 'pin' na WEB. Director di e compania Luis Oduber a splica NoticiaCla.com cu e investigacion a mustra kico tabata pues e motibo di e problema serio cu a surgi riba e diasabra 30 di juli ultimo. E ora aki coriente a bay pa por lo menos 4  pa 6 ora. Segun Oduber, en berdad e problema a origina na WEB ora cu un turbina a practicamente faya ocasionando e blackout. 

KICO A SOSODE

"Investigacion preliminar ta mustra cu e turbina 6 cu tabata controla e frecuencia, den careda di 8'or a subi di 20 mw y bay 40 sin cu ningun hende a dun'e instruccion ey. Esey a trece un desbalance cu a bay riba un speed maximo, pone e machine trip y a trece un 'upset' den e planta causando cu otro turbinanan tambe a cay afo". Loke a resulta e problema ta cu tabatin un pin chikito cu ta duna señal na cuanto e turbina mester core, a kibra cu a pone cu el a manda señal robes. E sistema cu ta controla e turbina a kere e ora cu e turbina a stop di draai. E pin ta controla e valve cu ta laga e steam drenta pa draai e turbina. E computer a haya e señal robes, y pone habri e valve mas ainda cu a bay den overspeed cu e consecuencia conoci. "Actualmente ta investigando kico a pasa cu e pin pasobra ta prome biaha cu e pin aki a kibra. A mand'e afo pa laboratorio investiga esaki y wak dicon el a kibra. E ta ubica un caminda cu normalmente hende no por yega na dje, cu ta un parti seya. Aki tin cu bay wak kico a sosode.