DOW: Cortamento mangrove ta segun regla internacional

ORANJESTAD - E compania encarga cu trahamento di e brug na Spaans Lagoen, ta bay cuminsa 'snoei' e ultimo parti necesario di e mangrove eynan cu por stroba e construccion di e brug. Ing Jossy Kock di DOW a sigura cu ta haciendo esaki bou di supervision di expertonan Hulandes y un compania local pa sigura cu e ta bayendo segun reglanan internacional. A sinta e siman aki riba e 'richtlijnen y awe e contratista mester a ahusta pa despues firma e documento firma. No ta papia di e tratado di Ramsar si, segun Kock aunke ta cumpli cu tur e rekisito cu ta wordo pidi den e tratado, Kock a sigura NoticiaCla.com.  "Den e proximo dianan nos ta bay corta e mangrove pa asina haci e parti ey liber pa sigui cu construccion di brug". Fotonan di drone di NoticiaCla.com ta mustra con e trabounan ta avansando.  

EXPERTO DI HULANDA

Un di expertonan cu DOW ta trahando cu ne ta sr Laurens di Hulanda cu ta di universidad di Wageningen, y segun su plan, lo sigui con e matanan mester wordo corta y kico ta bay ta e compensacion cu e contratista tin cu haci pa por construi e brug. Tambe tin e compania local ACE cu ta traha hunto cu Laurens pa tene e control diario di e trabou pa salvaguardia loke tin na mangrove. Hunto a produci cierto reglanan cu e contratista cu tin cumpli cu ne pa no trece daño na e sitio.

LUGARNAN DI COMPENSACION

E lugarnan di compensacion lo ta bay banda di Franse Pas, unda cu lo tin cu dileña precisamente locual tin cu wordo haci. Esey ta poni caba den documento, cu ta mustra cu lo bay rehabilita un parti di e mangrove pa stimula su crecemento. Den e prome parti cu a snoei caba, a ripara cu e mangrove a cuminsa bin bek y crece. "Esey ta un bon señal" Kock a bisa. Cu e mesun pensamento ta bay snoei e mangrove. "Esaki ta bay ta e unico parti cu ta bay snoei y despues di esaki no ta bay tin mas cortamento di e mangrove". A sigura cu a corta esaki na un minimo. 

CRITICA DEN PASADO

Den pasado tabatin hopi critica riba e asunto aki, unda cu ambientalistanan a mustra cu ta haciendo daño na e mangrove nan y asina ta violando varios tratado internacional, incluyendo esun di Ramsar. A pone hopi presion riba e compania di construccion (y Gobierno) unda cu NoticiaCla.com a compronde cu Hulanda tabatin hopi atencion riba esaki y cu si a viola e tratado aki, lo e por tabatin consecuencia pa e proyecto.  FOTONAN ta di NOTICIACLA.COM