Warda Costa a bolbe gara dos ilegal Venezolano riba lama

WILLEMSTAD - Wardacosta di Caribe (KWCARIB) a bolbe gara un boto cu dos Venezolano ilegal riba lama banda di Corsou. Nan a wordo gara di dialuna pa diamars, sospecha di a baha hende ilegal riba tera (na Corsou).  

Tabata dialuna anochi rond di mey anochi ora cu e operador di radar di e Reddings- en Coördinatie Centrum di Wardacosta a detecta un contacto sospechoso riba e radar, parti sureste di Corsou. Un unidad cu tabata patruya e momento ey parti suroeste di e costa, a wordo manda pa e sitio. Mas of menos miya y mei sur di Jan Thielbaai nan a topa un boto sin luz cu nomber di Genesis Jose, cu tabata move parti sur. Nan a wordo ordena pa para pero no a duna oido. A cuminsa un persecusion unda cu despues a para e boto. E dos tripulantenan a purba sink e boto, pero no a logra debi na intervencion lihe di un di e personanan di warda costa cu a bula abordo di e boto. A hiba e boto pa e punto di sosten na Parera. Ambos tripulante di nacionalidad Venezolano a wordo entrega na polis cu hunto cu Wardacosta ta continua cu e investigacion.