Oduber: Oferta cu AHATA ta menciona no ta valido mas

ORANJESTAD - "AHATA ta bastante bruha ultimamente". Asina minister di turismo Otmar Oduber a referi na NoticiaCla.com riba e reaccion di e gremio hotelero di diadomingo ultimo den prensa. Aki e gremio a publica un comunicado contestando gobierno indicando cu el a meramente propone loke cu partido AVP mes a propone na 2008 prome cu nan a drenta gobierno. Awe sinembargo, e situacion ta diferente segun Oduber. "Claro cu e no ta valido mas" Oduber a bisa di e proposicion cu AHATA ta referi na dje. Pues e argumento cu AHATA ta uza segun Oduber no ta sirbi. De hecho, Oduber ta recorda con AHATA a firma un MOU tambe hunto cu gobierno pa 'deshaci' dje idea pa un mayoritario ta den man di un of e otro banda, y pa e bira asina 3 miembro pa cada banda den e directiva. 

KAT IN HET NAUW

E carta cu AHATA a manda pa prome minister Mike Eman 24 ora prome cu trata e ley diabierna ultimo, Oduber ta considera como un acto di un pushi den preta. "Een kat in het nauw maakt rare sprongen" Oduber a bisa di e acto aki di AHATA. Esta pa pretende di kier bay bek na loke originalmente na 2008 a wordo papia, y kere cu esaki sin mas lo a pasa. "Mi ta imagina'mi esaki ta e ultimo cartuchi di AHATA caminda ainda kier imposibilita tratamento di un ley cu mester regula all inclusive na Aruba"

ASUNTO DI SOBORNO

E mandatario a mustra cu mientras cu publicamente ela referi na e acto di AHATA como uno di soborno, ta keda na prome minister Eman si e ta actua riba esaki pasobra e carta ta dirigi na su persona. Y si Eman tin pensa di contesta e carta di AHATA, tampoco Oduber no por a contesta obviamente.  "Bo tin cu puntra prome minister. Mi no por papia p'e. Pa ley e minister responsabel pa turismo ta e minister di turismo" Oduber a recorda tur hende. Personalmente Oduber ta mustra cu e no por considera e carta di AHATA como nada diferente ora cu ta condiciona fondonan pa gobierno, como uno di chantage of soborno.