No tur miembro di directiva di AHATA ta sostene proposicion na gobierno

ORANJESTAD - No ta tur miembro di directiva di AHATA ta di acuerdo cu e proposicion manera stipula den e comunicado cu AHATA a manda pa prensa diadomingo, refiriendo na e carta cu a manda pa prome minister Mike Eman siman pasa riba e tema di all inclusive. Por lo menos un miembro di e directiva, NoticiaCla.com a compronde cu ta desmenti cu nan tabata di acuerdo. Den e comunicado cu AHATA a manda diadomingo, e comunicado ta bisa cu 'AHATA a comparti e proposicion aki cu tur su miembronan di directiva y tur a aprob’e sin obhecion'. Esey sinembargo no ta corecto, segun Rene Kan, representante di doño di e hotel. Kan cu a papia cu NoticiaCla.com bisa a cu GM di Hilton Aruba Caribbean Resort & Casino,- miembro di directiva di AHATA -, a confirma na NoticiaCla.Com cu nan no tabata di acuerdo. 

SOSTEN UNANIME OF NO

"Pa medio di esaki mi kier clarifica cu e impresion cu AHATA a crea, cu nan ultimo press release tawata tin sosten unanime di tur miembronan di directiva di AHATA, y cu niun miembro di directiva no a presenta niun obhecion, no ta corecto den mi opinion" tabata reaccion di Kan. Segun Kan, talvez un mayoria di e miembronan den directiva tawata di acuerdo cu e press release, pero e miembro representante di Hilton Aruba Caribbean Resort & Casino den e board nunca no a duna di conoce cu e tawata di acuerdo y Hilton tampoco ta di acuerdo cu e press release. "No tawata tin suficiente oportunidad pa e miembro di Hilton den directiva por a presenta su obhecionnan contra e press release y probablemente e otronan tampoco" Kan a sigui bisa. "Pa tal motibo Hilton ta lamenta cu un impresion incorecto a wordo crea al respecto door di AHATA" Kan a finalisa bisando.