Lopez: Tur fraccion a pidi pa pospone reunion di Codigo Civil

ORANJESTAD - E reunion pa trata cambionan di e Codigo Civil manera ta conoci, ta posponi te otro siman dialuna. Den combersacion mas amplio cu presidente di Parlamento Marisol Lopez Tromp, ta fraccion di AVP a pidi un votacion si e reunion por a sigui si of no, of si mester a pospone esaki pa duna mas tempo pa preparacion. E votamento finalmente a resulta den 18 pro pa cambia e fecha y 1 contra. E unico voto contra tabata di propio presidente di Parlamento Marisol Lopez Tromp.

DOWERS A PIDI PROME PA POSPONE

Tabata minister Dowers cu inicialmente (for di mainta) a pidi mas tempo pa por contesta un carta manda pa parlamentario Desiree de Sousa Croes riba un proposicion cu lo por a evita tratamento completo di e amienda cu ela entrega. Lopez sinembargo a bay riba e punto di salida cu e ley aki tabata 5 aña den preparacion unda cu hopi instancia a reuni riba esaki pa e por a keda cla pa trat'e finalmente. Ademas, tabata sa dos luna prome cu e ley aki lo a wordo trata dialuna. No obstante esey, tanto minister Dowers y (Paul) Croes a pidi pa schors esaki pa por a reuni den e.o.  Conseho di Minister. Tur otro fraccion tambe a pidi pa pospone e reunion aki. Mientras cu tur a pidi pa pospone, tur esnan cu a vota, a haci esaki basa solamente riba e amienda riba union civil, siendo cu e ta solamente un parti di e ley di Codigo Civil. Ora cu a bira cla cu ta tur hende tabata kier un posponemento, esaki a sosode a base di votamento. No obstante esey, Lopez a mustra si cu e ta esun cu ta determina e ora ki ora y dia e reunion ta continua.