De Sousa: Despues di algun siman dificil, mi ta un persona feliz awe

ORANJESTAD  - " Despues di algun siman dificil, mi ta un persona feliz awe". Asina parlamentario Desiree de Sousa Croes a reacciona na NoticiaCla.com riba e dia di awe. De Sousa ta e parlamentario cu a entrega e amienda riba cambio pa union civil, como parti di e ley di Codigo Civil. E tratamento a keda posponi te otro siman riba e.o. sugerencia di de Sousa. "Mi ta sigur cu amor lo vence. Si no ta otro siman, lo ta pronto." de Sousa a bisa riba esey. 

E DIA MES

De Sousa a cataloga awe como 'un dia pisa di debate riba un tema importante". Segun e parlamentario, pa prome biaha por a tende e voznan scondi di e grupo LGBT riba nos isla. "Un grupo cu pa mucho tempo tabata lubida, awe ta tema central den sala di Parlamento. Esey caba tabata un triunfo grandi" de Sousa a bisa. E hecho cu cada un orador a reconoce cu tin un desigualdad y cu mester drecha e situacion, ta otro logro pa e comunidad completo. "Despues di algun siman dificil, mi ta un persona feliz awe. Mi ta sigur cu amor lo vence. Si no ta otro siman, lo ta pronto" de Sousa a finalisa bisando.