Booshi Wever: Existencia di Lands Laboratorium ta core peliger

ORANJESTAD -  Derecho di existencia di Lands Laboratorium ta core peliger segun lider di partido Union Patriotico Progresista Booshi Wever. Segun Wever, ya pa varios aña ta bin ta discuti e derecho di existencia di Landslaboratorium. “Tempo cu mi tabata encarga cu e servicio aki, mi a considera esaki un servicio fundamental y basico pa nos cuido medico, y mi a tuma e decision pa privatisa esaki y pa hacie un NV di gobierno, pues di Pueblo” Wever ta bisa. Segun e ex minister, esaki pa garantisa pueblo un servicio optimal tur ora y na un prijs razonable. Y trabounan a cuminza respecto esaki, pero segun Wever, lamentablemente despues cu gobierno a cambia na 2009, e proceso a ser para. Despues di 2009 te hasta a ser discuti pa laga dr. Horacio E. Oduber tuma over parti di e servicio cu e laboratorio ta duna na HOH. E momento cu minister Schwengle a asumi e responsabilidad di Landslaboratorium, por a ripara cu a cuminza cu un proceso pa de sangra dicho servicio.

Segun Wever, un di e decisionnan cu el a tuma e tempo ey, pa cu e privatisacion aki, tabata cu cada empleado nobo lo no a bin na remarca mas pa drenta den servicio como empleado publico, pero como un “arbeidscontractant”. “Mi a menciona caba den un publicacion anterior cu e personanan aki, cu di buena fe a acepta e oferta di un arbeidscontract, a bin ta bira victima di e fracaso financiero cu e gobierno di Mike Eman I a hiba e ultimo 5 aña.” Nan a wordo obliga pa acepta un rebaho di 20% den nan salario, y tambe a bin ta resulta cu nan no a participa den e fondo di pensioen di APFA, esaki basa riba e pensioen general cu recientemente a ser introduci. Pero e medaya semper tin dos banda, pasobra pa reduci gasto e minister a decreta cu nan lo traha tambe 80% y cu nan lo no wordo paga “overtime”. E pregunta ta si e minister tambe a haci e mes un ehercicio di baha salario di su coordinadornan cu 80% manera cu a socede cu trahadornan den e departamento di salubridad y principalmente na laboratorio.

Segun Wever, e minister no a haci esaki, cu e excusa fofo cu e kier a proteha su coordinadornan, supuestamente pa nan experticio den salubridad, pero ta un secreto publico cu nunca e departamento aki a funciona di e malo ey manera awor ta e caso. E consecuencia ta cu e servicio di Landslaboratorium pa pacientnan interna den hospital tambe a conoce un deterioro formal y peligroso. Ya cu “overtime” no ta wordo paga, e pacient cu mester un estudio di sanger urgente durante oranan di anochi, lo mester warda te ora e unico dokter na warda den hospital haña un oportunidad pa cumpli cu esaki. E unico persona cu tin mag di “prik sanger” ta e dokter di warda, pasobra no ta tarea di e enfermero nan cu ta na warda na e momento ey, pa cumpli cu e ordo di e specialista .