Parlamento ta trata e.o. amienda union civil awe

ORANJESTAD - Si tabatin cualkier duda cu awe ta trata e.o. e amienda pa union civil, murayanan di Parlamento a recorda tur hende. Dos muraya (y bentananan) a lanta sushi cu grafiti cu e tema di e amienda pinta na cora. Aunke e reunion ta programa pa 10or awe mainta, ya tabatin hende pafo en espera varios ora prome cu e reunion aki tuma lugar. Lo trata varios cambio di ley di e Codigo Civil, pero esun mas papia ta esun di union civil. Protesta, marcha, reunion y mas a tuma lugar ultimo simannan pa accentua e importancia di e ley aki. Si tabatin impresion cu ta solamente e grupo di LGBT tabata defende y promove e amienda, diadomingo un grupo diverso di persona cu no ta di e comunidad LGBT a uni y mustra nan sosten riba plaza Wilhelmina dilanti e estatua di Anne Frank, un simbolo di igualdad.