Minister Oduber ta denuncia carta di soborno di AHATA

ORANJESTAD – Minister Otmar Oduber den Parlamento ta denuncia carta di soborno di AHATA pa prome minister Eman. E mandatario durante tratamento di e ley di All Inclusive a expresa su decepcion pa e forma con Parlamentarionan a actua durante e reunion aki. Segun e mandatario a saca hopi puyito manera un carta di “soborno” cu AHATA a manda pa prome minister Mike Eman.

POCO PREGUNTA DI PARLAMENTARIONAN

Segun e mandatario, el a scucha durante algun ora presentacion di Parlamentarionan y a haci solamente 17 pregunta di cual 5 ta preguntanan ripiti. E ta lamenta esaki pasobra e ley ta pa futuro di pais Aruba, pa un miho porvenir cu tabatin te cu aworaki y pa e futuro generacion. 

MINIMALISA EFECTO ALL INCLUSIVE

E mandatario a splica den su presentacion den Parlamento tur loke cu ela haci pa minimalisa e efecto di All Inclusive, pa cual a laga traha rapport unda cu AGA (Aruba Gastronomic Association) a bisa cu nan ta contra e tipo di turismo aki, esun di PWC ta bisa cu e turista aki ta gasta menos na Aruba (den hotel) y pafo. El a menciona con algun hotel ta menasa miembronan di AGA cu si nan sigui apoya e ley di all inclusive lo no manda huesped mas pa nan. Ela duna e ehempel cu RIU mes tabata asina hopi aña y nunca tabata kier ta miembro di AHATA. Ta despues cu el a combersa cu e propietarionan di e hotel, el a convence nan pa uni na AHATA. 

PIDA MAS PISA DI E REUNION

Pero e pidi mas pisa di e reunion aki, segun e mandatario, ta ora cu el a papia di un carta cu AHATA a manda pa prome minister Eman, y cual Oduber ta considera un soborno. AHATA ta pidi pa nan haya 4 miembro den ATA, unda cu nan lo tin tur cos di bisa, y a cambio Gobierno ta haya sigura tur aña 35 miyon dollar.  “Esaki ta e top punt,” Oduber a bisa den un bos hopi indigna. El a splica cu 4 miembro den e directiva di ATA, Parlamento lo no tin nada di bisa y e hotelnan lo haci y deshaci. Y a bisa cu e carta ta manera un grito di desesperacion, cu a yega Gobierno un dia prome cu Parlamento mester a trata e Ley di All Inclusive. MEP a reacciona mesora bisando duna nomber pa duna e mandatario apoyo pa entrega un keho na Ministerio Publico. Na e momento ey Presidente di Parlamento drs. Marisol Lopez Tromp a pospone tratamento di e ley aki te cu diamars, 23 di augustus awor.