De Meza: Ley di CITGO rumbo pa parlamento

ORANJESTAD – E ley cu lo autorisa e acuerdonan cu Valero Energy Corporation y CITGO Petroleum Corporation a wordo aproba unanimamente diabierna ultimo den reunion di Conseho di Minister. “E gabinete completo a firma e proyecto di ley aki,” minister Mike de Meza a declara. “Esaki ta ilustra e importancia di e ley pa desaroyo economico di nos isla, maneho monetario, empleo, finanzas publico, como tambe uzo di tecnologianan limpi.” E mesun atardi e proyecto di ley a sali rumbo pa Gobernador cu na su turno lo present’e na Raad van Advies y siguientemente na Parlamento di Aruba.

“Rehabilitacion di e actividad economico historico aki ta mas cerca cu nunca,” asina Minister Mike de Meza – cu a haci rehabilitacion di e pilar economico aki posibel – a bisa. E reapertura ta brinda hopi oportunidad pa empresanan cu semper a brinda servicio na e refineria, como tambe na personanan cu semper a labora den e industria aki.  “No mester lubida e decenas di Arubiano trahando den exterior cu ta haya oportunidad pa regresa nan pais,” e mandatario a declara. “Unda nos ta awe ta un resultado concreto di e empeñonan cu Gobierno di Aruba a hiba for di algun aña caba. Ademas reapertura di e refineria ta contribui na diversificacion di nos economia cu ta central den e maneho economico di Gabinete Mike Eman II. “Specialmente e parti p’ariba di brug ta conoce atrobe un empuhe di actividadnan comercial,” sr. De Meza a enfatisa. 

E ley lo autorisa Gobierno di Aruba pa drenta den acuerdonan cu CITGO pa lease e instalacionan pa un periodo di 15 aña cu un posibel extension di 10 aña mas, como tambe pa cera un acuerdo unda cu Valero ta termina su operacionan definitivamente y ta traspasa e instalacionnan, terenonan y demas propiedad na Pais Aruba. “Di e manera aki, pa prome biaha den historia, Aruba ta doño di su propio refineria,” e mandatario a bisa orguyosamente. Pa haci e operacion di e refineria posibel, e ley ta autorisa Gobierno di Aruba pa establece un compania estatal, Refineria di Aruba (RDA) N.V., cu tin e control exclusivo di terenonan den erfpacht y e instalacionnan. Temporariamente RDA lo fungi como e accionista unico di e compania cu ta suministra e mercado local.

Na 2010 Gobierno di Aruba a introduci un regimen fiscal specialmente pa refineria y terminalnan petrolero. E regimen aki ta obliga refinerianan pa paga un minimo di $10 miyon anualmente na winstbelasting. “E regimen fiscal aki ta keda vigente y aplicabel pa CITGO,” minister de Meza a indica. “E ley ta contene algun ahuste tecnico cu den practica ta mas efectivo pa ehecuta.” Pa loke ta trata e parti medio ambiental, e ley ta contene un cambio den e Hinderverordening unda cu lo bin cu criterianan specifico pa tera, awa, lama y aire cu refinerianan y terminalnan petrolero mester cumpli cu ne.

Despues cu Raad van Advies duna su conseho riba e ley, e ta wordo presenta na Parlamento di Aruba.