A termina relacion di trabou cu director di Colegio EPI

ORANJESTAD - Minister di Enseñansa, Michelle Hooyboer-Winklaar a tuma e decision pa termina e relacion di trabou cu e director general di Colegio EPI, esta Martin Richardson. Hooyboer-Winklaar a indica cu tin varios factor y incidente cu a contribui na e decision aki. E mandatario den un comunicado diadomingo atardi a mustra cu a menciona cu ambos Dienst Publieke Scholen y Ministerio di Enseñansa a atende e director general na mas di un ocasion riba su forma di maneha e scol y riba su manera di comunica cu e personal. 

Segun e mandatario, ta un hecho cu tin diferente situacion y varios reto pa atende na Colegio EPI y mester un lider constructivo cu ta traha na un manera positivo cu henter e organisacion pa por logra e metanan. "Lastimamente Martin Richardson no a demostra di ta e persona cu por a gana e confiansa di e organisacion y p'esey no ta responsabel mas pa mantene e relacion di trabou" e mandatario abisa. 

Mientrastanto Hooyboer-Winklaar a manda un carta diadomingo na tur docente y personal di Colegio EPI cu e informacion di e decision pa cu e funcion di e director general. E titular di enseñansa a menciona den su carta na e docentenan y personal di sosten, cu e ta consciente cu e situacion actual ta incomodo, pero ta convenci cu pronto lo yega na un solucion pa trece e trankilidad atrobe na Colegio EPI na bienestar di e personal y studiantenan.