AHATA: Proposicion ta pa tin un rol mas prominente den ATA

ORANJESTAD- "Gobierno a keha cu AHATA no a haci un proposicion den cual ta atende cu e preocupacionnan den turismo, pues p'esey diahuebs ultimo nos a entrega un otro proposicion cu nos ta sinti cu lo por yuda bolter e situacion" Asina AHATA a reacciona diadomingo riba e reaccion cu a bin di e carta cu nan a manda siman pasa pa gobierno. 'Nos industria turistico no ta bayendo mes bon manera e lo mester bay. Y tur hende sa esey! Ta nota un caida den yegada di pasaheronan, caida den e cantidad di placa cu cada turista ta gasta ora ta na Aruba y un percepcion general cu ta atrayendo e calidad di turista robes pa nos isla. Bisando tur esaki, turismo ta bayendo den e direccion robes" e comunicado ta sigui bisa. 

PROPOSICION DI AHATA

E proposicion cu AHATA a manda pa gobierno, a wordo cataloga como un 'soborno' pa minister di turismo Otmar Oduber. AHATA sinembargo ta splica kico e ta ensera. "E posicion di AHATA ta masha simpel; Nos ta convenci cu nos por hunga un rol mas prominente den comberti Aruba Tourism Authority (ATA) den un organisacion mucho mas efectivo. AHATA y su miembronan ta masha preocupa pa e direccion a largo plaso cu nos turismo ta bayendo y nos kier traha na e miho interes di Aruba y pa tur cu ta biba riba nos isla" AHATA ta sigui bisa. "Esaki mes ta e motibo tambe pakico AHATA ta propone pa tin 4 miembro den e Hunta di Supervision di Aruba Tourism Authority y pa Gobierno tin 3 miembro. Ta interesante pa menciona cu esaki ta precisamente locual Partido AVP y Otmar Oduber a propone caba na aña 2008, prome cu nan a wordo eligi pa goberna e pais aki", indicando cu esaki no ta nada nobo, sino loke ta cu gobierno mes a propone." Den nan mesun documento titula “Nota di discusion encuanto turismo y transporte: Plataforma di Turismo” presenta dia 27 di october 2008. Riba pagina 12 y 13 na e tema di “Organisacion y financiamento di maneho turistico” nan a skirbi bon cla cu: E organisacion di ATA mester wordo profesionalisa. Esaki ta nifica cu mester aumenta e capacidad di e organisacion pa prepara y formula maneho strategico. E Minister responsabel pa turismo ta esun cu den consulta estrecho cu ATA y AHATA ta stipula e maneho strategico pa cu turismo. Ademas lo institui mediante ley un fondo pa turismo cu mester garantisa un fluho continuo di medionan financiero pa turismo. Mediante e mesun ley aki lo institui tambe un “tourism board” cu e tarea pa 1) administra y maneha e fondo pa turismo y 2) implementa e maneho strategico di gobierno. E tourism board lo haya sosten di un staf chikito di profesionalnan. E miembronan di e board lo consisti di miembronan apunta door di Gobierno y miembronan apunta door di AHATA, cu lo mester haya un mayoria den e board. Pues tur locual nos a bisa Gobierno ta, cu si sector priva ta hunga un rol mas grandi den maneha Aruba Tourism Authority, cu lo e por opera mucho mas eficiente y cu esey lo por conduci cu ta spaar 35 miyon florin cu Gobierno lo por uza mas efectivo pa cosnan mas necesario, manera scolnan, salubridad publico, pa Cuerpo Policial, cu ta un asunto cu nos ta kere cu claramente lo conta cu sosten di e mayoria den Conseho di Minister.

APROBACION SIN OBHECION

AHATA ta sigura den e comunicado cu nan a comparti e proposicion aki cu tur su miembronan di directiva y 'tur a aprob’e sin obhecion'. Y mescos cu tur otro proposicion, esaki tambe mester mira como un punto di salida pa mas negociacion'. "Manera cu nos a bisa caba, Gobierno a pidi pa un proposicion y nos a cumpli den presenta un na dje!" e comunicado ta finalisa bisando. 

MINISTER ODUBER TA YAMA OFERTA UN 'SOBORNO'

Ora cu e carta a wordo presenta, e mandatario di turismo mesora a reacciona riba esaki prome den reunion publico diabierna, y despues riba su pagina di FACEBOOK. "Esaki ta e carta di AHATA, unda ta purba soborna gobierno!" Oduber ta cuminsa na bisa, pa despues repasa e 6 puntonan cu AHATA ta haci mencion di dje, manera e punto di 4 miembro di AHATA apunta, y duna gobierno un suma miyonario a cambio pa e acuerdo. "Tur esaki despues cu 7 luna pasa, e mesun CEO aki di AHATA (Jim Hepple:red) a declara cu ATA ta un instituto cu e region ta envidia, di bon cu e ta wordo opera. Esta un berguensa!" e mandatario a finalisa bisando.