Ciudadanonan preocupa pa derecho igual a topa

ORANJESTAD - Den un forma di mustra preocupacion pa derecho igual di nos isla den comunidad, un cantidad di entre 250 pa 300 persona a uni den Wilhelminaplein, dilanti e estatua di Anne Frank diadomingo atardi. E grupo aki tabata representa varios sector di comunidad, y no solamente e comunidad LGBT di Aruba. Motibo principal di e 'reunion' tabata pa esnan presente a mustra nan sosten pa e amienda pa 'union civil' cu tin cu wordo trata dialuna mainta den Parlamento. Notabel tabata personahenan di tur sector den comunidad, personahe conoci como 'BA'rs, esta Bekende Arubanen, tambe tabata presente na e encuentro aki. 

DERECHO IGUAL

Esnan cu a bin tabata pues pa mustra nan preocupacion reinante cu tin pa cu e futuro di nos derechonan igual, cu ta den liña cu e principio di no discriminacion manera stipula den constitucion di Aruba. Entre esnan cu a hiba palabra, naturalmente tabata e persona cu a presenta e amienda, parlamentario Desiree de Sousa Croes. Notabel tabata e cantidad grandi di famia y hoben cu a haci acto di presencia na e encuentro aki.

E AMIENDA

E ley di cambio den nos Codigo Civil, ta wordo trata dialuna mainta unda cu aki e amienda pa union civil lo wordo presenta tambe. Diahuebs ultimo, e amienda aki a wordo presenta di nobo, den un version diferente unda cu kier a sigura cu e ta bira mas cla y evita mal comprondemento. Den un reaccion na NoticiaCla.com e momento ey, de Sousa a splica cu a añadi mas articulo pa asina kita duda y trece mas claridad. A revoca e amienda original entrega dia 5 di juli, y a presenta esun nobo dia 17 di augustus ultimo. E asunto aki a crea basta problema y polemica den comunidad ultimo simannan y e encuentro aki diadomingo tabata pa demonstra preocupacion pa cu esaki.