Pa evita aanwijzing, Aruba a permiti Hulanda controla nos presupuesto

ORANJESTAD – “E impasse cu tabatin entre Aruba y Hulanda a keda resolvi y mañan den Rijks Minister Raad no tin ningun aanwijzing pa Aruba”. E prome palabranan diahuebs atardi di un prome minister visiblemente alivia. Di otro banda, Eman ta admiti si cu prome cu ta asina lew cu gobernador por firma e presupuesto, mester somete esaki na un investigacion rigoroso di por lo menos dos siman. Y ainda despues, por tin chens cu e no ta corecto cu tur su consecuencia cu esaki por tin. Algo cu Eman a admiti na NoticiaCla. Mientras cu Eman ta papia di a scapa di un aanwijzing, e ta permiti Hulanda 'inzage' rigoroso den e presupuesto, y como tal, (interpreta pa hopi) cu asina a entrega parti di nos automia. E comision aki, - Eman no ta yame manera CFT pasobra e ta a base voluntario y no mester duna oido na dje si no kier- , tin e tarea di evalua e presupuesto y trece cambio si mester. Y si e cambionan aki ta conta cu aprobacion di e comision, e ora gobernador por firma esaki. Pues, Eman a mustra cu poco palabra, cu mientras cu pa awor e aanwijzing no tey, cos no ta cla ainda.

Despues d un siman di silencio, acompaña pa 4 di su ministernan di gabinete, Mike Eman a purba sigura comunidad di Aruba cu e isla a scapa di un posibel aanwijzing di parti di Reino pa medio di un acuerdo (lesa e acuerdo) firma entre su persona, premier Mark Rutte di Hulanda y tambe minister Ronald Plasterk. Loke si Aruba mester haci, ta somete su mes na un investigacion rigoroso di algun siman, pa despues dicidi si e ta na agrado pa gobernador di Aruba firma esaki. Mes momento lo sigui un proceso rigoroso pa garantisa cu algo asina no por sosode mas. Segun Eman, e loke a ‘logra’ ta cu Aruba ta mantene e autonomia y e derecho pa actua den su mesun cas. Eman no ta considera e loke a pasa e siman aki entre Hulanda y Aruba, no ta un deuk den su gabinete, sino mas bien ‘un experiencia’, e mandatario a bisa NoticiaCla.

 E prome mandatario a purba splica den e forma mas elocuente posibel con henter e proceso a bay, sin cu su gabinete mester a perde cara den henter e proceso aki. Gobierno di Reino kier a mira kico e pasonan ta cu Aruba ta tuma pa resolve su ‘retonan’ financiero, unda cu a drenta den contacto mesora cu gobierno di Reino. For di e momento ey, a sigui reunionnan telefonico maratonico durante varios ora di dia (hasta marduga), y a trece hopi claridad segun Eman. Tabatin particularmente dos anochi cu Eman a resalta di e siman unda cu tabatin yamadanan di 2 or te 6 or di madruga cu partnernan di Hulanda pa por a keda cla cu e asunto aki. E tema aki por a trece un ruptura entre e relacion entre Aruba y Hulanda (cu segun Eman a dura hopi largo pa traha ariba).

E silencio cu e mandatario a tene, tabata uno escohi pasobra e no a kere cu un debate publico den e periodo aki lo a yuda e causa aki ningun tiki. Un discusion publico lo por a laga rastro nan cu herido cu no tabata necesario. Pesey e mandatario a opta pa keda keto te ora a soluciona e problema. “Nos a resolve a asunto aki conservando e derecho di mas fundamental cu pueblo por tin, esta e derecho democratico, cu su parlamento ta e organo mas halto y tin e bos final riba e presupuesto riba un pais.

Loke tur esaki ta nifica awor, ta cu e ta habri caminda pa gobernador di Aruba firma e presupuesto porfin, aunke no por a mara un tempo exacto pa e tuma lugar. Riba e pregunta di NoticiaCla cu “si mester pensa riba algun dia of 2 siman, cua e por ta?”, e mandatario a contesta ‘Algun dia’, habriendo caminda pa un confusion di ki ora exactamente gobernador por firma e presupuesto of no. Tambe ta asina cu un comision di investigacion di dos persona apunta pa Hulanda y Aruba, lo tin cu wordo presidi pa un persona apunta pa nan dos. Eman a confirma na NoticiaCla, cu si nan no haya otro, esta cu e resultado di e investigacion no ta na agrado di parlamento, cu esey lo ta un discusion despues cu lo por wordo teni tambe. Pues nada no ta sigur na final di dia. E hecho cu no tin presupuesto firma, ta pone cu ainda gobierno su situacion financiero ta keda precario y no ta mucho saludabel. Algo cu Eman a confirma, aunke cu diahuebs por a nota claramente cu pa awor, esey no ta un precupacion directo pe. Importante ta cu segun Eman, Aruba no ta wordo presenta cu un aanwijzing. Cu si esaki ta nifica cu e aanwijzing no ta riba agenda mas pa diabierna, Eman su contesta na NoticiaCla tabata ‘ mi no sa’. Pues mientras cu Aruba a 'permiti' Hulanda 'inzage', y participacion den un investigacion, cosnan no ta completamente cla ainda.