Parlamento bou presion di FATF a afecta abogacia na Aruba

ORANJESTAD - Parlamento di Aruba,- bou di presion di e Financial Action Task Force (FATF) -, a afecta independencia di abogacia y su secrecia di trabou. Asina presidente di orden di abogado Hans Sjiem Fat a declara diabierna atardi den su discurso durante huramentacion di huez Jaap Sap y e PG nobo Alex van Dam. "Orden di abogado ta haya cu e obligacion pa meld transaccionan inusual di su cliente,- sin su conocemento -, ta un acto inaceptabel di secrecia di e profesion y e independencia di e abogado", Sjiem Fat a bisa. 

TRANSFORMA DEN UN OFICIAL DI INVESTIGACION

E ley en cuestion cu Sjiem Fat ta referi na dje, mester a transforma e abogado di un hende di confiansa, pa un ambtenaar di investigacion gratis cu e meta pa combati labamento di placa y financiamento di terorismo. Door di kita e balor fundamental di abogacia, un abogado awor no por funciona corectamente, segun Sjiem Fat. "Secrecia di trabou y e independencia di un abogado ta su privilegio, cu ta parti un estado di derecho, y ta destina pa promove cu un persona cu mester di ayudo di ley por haci esaki sin miedo cu informacion suministra cu ta necesario pa su defensa, ta bira publico. Y tambe cu e abogado por asisti su cliente sin miedo, tambe den caso di disputa cu gobierno" e presidente di e orden a sigui bisa. E presidente di e orden ta mustra tambe cu di ningun manera mester ta normal cu e balornan fundamental ta wordo subordina na 'invencion di berdad' ora ta trata di combatimento di labamento di placa y financiamento di terorismo. 

ESCOHENCIA POLITICO LAMENTABLE

"Ta trata di un escohencia politico lamentabel" Sjiem Fat a sigui bisa. E hecho cu e regimen di FATF a wordo introduci tambe den Union Europeo, no ta convence orden di abogado di Aruba cu esey ta nifica cu e ta algo bon. "Two wrongs don't make a right", Sjiem Fat a bisa, uzando e dicho ingles cu ta nifica, cu dos decision robes no ta haci'e corecto.