SMOA a yega na acuerdo awe cu rector nobo pa Colegio Arubano

ORANJESTAD - Diabierna merdia SMOA a yega na un acuerdo cu e persona cu mester bira e proximo rector di Colegio Arubano. Despues cu NoticiaCla.com a raporta di e intencion pa nombra e persona aki, cos a desaroya lihe y algun ora despues mes SMOA a informa NoticiaCla.com cu a yega na un acuerdo cu e persona ey mes. Solamente cu kier pa cada partido informa nan respectivo circulo di hende, pa evita cu nan ta bin tende via prensa. A compronde cu pa dialuna ora cu firma contracto posiblemente, lo informa ken e persona aki ta. 

PAKICO NO POR A DUNA NOMBER PROME

E motibo cu no por a duna nomber di e rector nobo di Colegio Arubano, tabata simplemente pasobra e acuerdo cu e candidato no ta cla ainda. "Mi ta spera cu pa dialuna nos por participa ken e persona aki ta y anunci'e publicamente", Bart Kool como presidente di Stichting Middelbaar Administratief Onderwijs (SMOA) a confirma na NoticiaCla.com diabierna mainta. Tin un candidato, pero e combersacionan ta 'andando' y como tal no por duna nomber ainda di e persona. Fuera di esey no tin nada misterioso cu e persona aki. "Formalmente p'esey mi no por bisa cu nos tin un rector nobo caba". 

PROCESO CU A SIGUI

Segun Kool, a sigui un proceso di seleccion cu a inclui un comision consistiendo tambe di algun docente di e scol. For di e grupo di 33 persona cu a solicita, tabatin algun local tambe aunke nan no a cay den e seleccion. SMOA a selecta un persona cu nan ta considera como e candidato potencial, pero 'ainda nos ta den negociacion', e presidente a sigui bisa. E contracto di e persona aki ta valido mas sigur pa 5 aña, y su salario lo ta mucho menos cu su predecesor, esta Frans Timmermans. E salario lo a basa riba e salario riba nivel manera cu gobierno a determina, Kool a sigui bisa. 

SITUACION DUBIOSO?

Kool a desmenti cu e proceso tabata dubioso y misterioso. "E tabata un proceso cuidadoso" Kool a bisa. Hunto a traha pa yega na un candidato nobo pa bira e rector di e scol. "Den henter e  seleccion cuidadoso, nos a logra haya e miho candidato y como tal nos por bisa cu e proceso a cana bon, trankil y a duna tur hende nan input y balor". E ta spera cu pa dialuna por anuncia nomber di e persona. "E persona ta na Aruba caba" Kool a sigui bisa. Pero mirando cu e contracto no a wordo firma, ta impedi pa duna e nomber. E comision a consisti di e.o. 3 docente di Colegio Arubano, un miembro di directiva y un hende di RvT. Hunto cu asistencia di e oficina di ADVANCE di Jan Noordzij, a traha riba un perfil. 

PAKICO NO UN ARUBIANO

Mientras cu no a selecciona un Arubiano, tabatin algun si cu a solicita. Segun Kool, e structura manera cu e ta aworaki, no ta pone cu ta necesariamente un local mester haya e funcion. "Den e perfil, e rekisito cu e persona mester ta un 'yiu di tera' no ta aparece. Esey ta nifica cu por busca un persona di afo tambe. Esey no ta kita afo segun Kool, cu esey no lo cambia den futuro. De hecho, Kool a mustra cu lo ta bunita si por nombra un persona local den e funcion. "Esey no a logra te ainda. Pero pa haci e posibilidad mas grandi pa den futuro esey sosode, Colegio Arubano a dicidi cu hunto cu Universidad di Aruba lo sondea e posibilidad pa cuminsa un programa di management trainee unda cu candidatonan potencial cu kier haya un funcion gerencial na Colegio, por prepara nan mes pa un periodo di 2 pa 3 aña. De hecho Kool a mustra cu ta basa tambe riba un proposicion di minister di enseñansa Michelle Hooyboer 'Collaborative Leadership" unda cu lidernan di scolnan ta haya e chens pa domina e principio di lider bon.