Reunion riba all inclusive suspendi te diamars mainta

ORANJESTAD - E reunion publico pa trata e ley di all inclusive a keda geschorsd te diamars 10'or di mainta. Presidente di parlamento Marisol Lopez Tromp a confirma na NoticiaCla.com cu tabatin compromisonan cu Parlamento mester a atende diabierna atardi y no tabatin planea pa e reunion sigui te anochi laat manera antes. Y mirando cu tin e reunion di Burgerlijk Wetboek programa pa dialuna, mester a move esun di awe pa diamars e ora.  "E reunion tabata consiso, pica" Lopez a bisa tambe. E unico momento cu por bisa tabatin algo cu mester a hala atencion tabata mainta na comienso ora cu a cuminsa pidi e rapport di PWC. 

COMIENSO DI E REUNION

Manera ya NoticiaCla.com a raporta inicialmente, e rapport di PriceWaterhouseCoopers (PWC) riba e tema di all inclusive tabata e prome 'issue' ora cu e reunion tan anticipa riba e topico aki a cuminsa den Parlamento awe mainta. Si e rapport ta existi of no, tabata e prome confrontacion entre minister Otmar Oduber (di turismo) y parlamentarionan di oposicion. "Mi no por duna un rapport cu no ta existi" Oduber a bisa riba peticion di presidente di Parlamento Marisol Lopez. "E minister mes ta referi na e rapport publicamente!" parlamentario Adi Thijsen a bisa. For di tribuna, tambe tabatin e interes necesario pa e reunion mainta. Pa loke ta e asunto di biahe pa Parlatino, e unico parlamentario cu a bay, ta Glenbert Croes, mientras cu parlamentario Guilfred Besaril ta malo na cas. Fraccion di AVP no a biaha y cu excepcion di parlamentario Jennifer Reyes (cu ta cu zwangerschapverlof), tabata completo den Parlamento. 

PETICION DI DOCUMENTO

Segun presidente di Parlamento Lopez, e esencia tabata cu dos lider di fraccion a pidi un documento cu ta wordo bisa di ta un draft inconclusivo, pero cu ta wordo referi na dje den cierto documento. "Nan ta pidi e stuk aki y minister ta bisa cu e stuk no ta existi. E esencia di tur e puntonan di ordo ta cu e leden nan ta pidi e stuk aki pa sea tur statenlid of ter inzage" Lopez a clarifica e ora. "Esey ta e pregunta. Pa haya sea cu e ta un draft of niet, si parlamento por haya un bista di e informacion. Esey ta e informacion" Lopez a bisa. Minister Oduber su reaccion tabata cu e documento no ta oficial. 

REUNION

E reunion a continua den curso di dia unda cu varios parlamentario tabata programa pa hiba un discurso pa despues minister contesta esaki.