Polisnan di Aruba a bay Bonaire pa asisti cu caso polis morto

ORANJESTAD - Un grupo di polis di Aruba a biaha pa Bonaire pa asisti nan coleganan eynan cu e investigacion riba morto di nan colega polis Ferry Bakx durante un caso di atraco. Alto comisario di polis Dolfi Richardson a confirma na NoticiaCla.com cu e grupo a bay, pero pa motibo di seguridad no por bisa cuanto a bay, ni cuanto tempo nan lo keda. "Semper nos ta sostene otro. Semper nos ta mas fuerte" Richardson a motiva na NoticiaCla.com. Fiscal Mayor na Bonaire a ofrece tambe un recompensa di $10.000,= pa cualkier persona cu tin tip cu por resolve e caso. 

E CASO

Tabata diaranson anochi cu e agente policial Bakx a fayece a consecuencia di herida ricibi di un atracador cu a tira riba dje durante un intercambio di tiro. Atracadornan a tira un atraco na un bario afluente di Bonaire na e parti west di e isla. Durante e intercambio di tiro, Bakx a keda alcansa pa un bala den pecho cu a resulta fatal p'e. 

TIP OFRECI

Fiskal Mayor y Hefe Interino di cuerpo policial ta haci un yamada urgente na comunidad pa ta alerta pa lo siguiente: Tin indicacion cu un di e sospechosonan lo a keda huña den su cara durante di e atraco. Cualke persona cu mira un homber cu huña fresco den su cara, por fabor tuma contacto cu polis mas pronto posibel na number di telefon 717-8000 of e liña di tip anonimo cu ta 717-7251. Pa awor esaki ta unico descripcion cu por duna. Finalisando pa awor Fiscal Mayo y hefe Interino di cuerpo policial ta bolbe garantisa comunidad cu ta haciendo tur esfuerso pa resolve e caso di atraco y tiroteo fatal aki mas pronto posibel pa asina comunidad por sinti su mes mas sigur, pero mester di yudansa di comunidad door di yuda e tip.

Den e caso serio aki Fiskal Mayor ta ofrece un recompensa di $10.000.