Rapport 'inconclusivo' PWC cuestiona den reunion all inclusive

ORANJESTAD - E rapport di PriceWaterhouseCoopers (PWC) riba e tema di all inclusive tabata e prome 'issue' ora cu e reunion tan anticipa riba e topico aki a cuminsa den Parlamento awe mainta. Si e rapport ta existi of no, tabata e prome confrontacion entre minister Otmar Oduber (di turismo) y parlamentarionan di oposicion. "Mi no por duna un rapport cu no ta existi" Oduber a bisa riba peticion di presidente di Parlamento Marisol Lopez. "E minister mes ta referi na e rapport publicamente!" parlamentario Adi Thijsen a bisa. For di tribuna, tambe tabatin e interes necesario pa e reunion mainta. Pa loke ta e asunto di biahe pa Parlatino, e unico parlamentario cu a bay, ta Glenbert Croes, mientras cu parlamentario Guilfred Besaril ta malo na cas. Fraccion di AVP no a biaha y tabata completo den Parlamento. 

PETICION DI DOCUMENTO

Segun presidente di Parlamento Lopez, e esencia tabata cu dos lider di fraccion a pidi un documento cu ta wordo bisa di ta un draft inconclusivo, pero cu ta wordo referi na dje den cierto documento. "Nan ta pidi e stuk aki y minister ta bisa cu e stuk no ta existi. E esencia di tur e puntonan di ordo ta cu e leden nan ta pidi e stuk aki pa sea tur statenlid of ter inzage" Lopez a clarifica e ora. "Esey ta e pregunta. Pa haya sea cu e ta un draft of niet, si parlamento por haya un bista di e informacion. Esey ta e informacion" Lopez a bisa. Minister Oduber su reaccion tabata cu e documento no ta oficial. 

REUNION

E reunion ta continua den curso di dia unda cu varios parlamentario ta programa pa hiba un discurso pa despues minister contesta esaki. Ta premira cu den curso di fin di dia, e reunion lo por termina cu un voto sea na fabor of contra.