Danker: A habri EPI aunke e situacion no ta mucho facil

ORANJESTAD - Cos no a bay mucho bon diahuebs na EPI cu entrega di rooster. Varios tabata e critica di maestro y alumnonan, cu tabata mustra nan descontento y e forma segun nan, con bruha cos a cana. Miembro di directiva di EPI Ankie Danker sinembargo a splica NoticiaCla.com cu no obstante e problemanan cu tin, a dicidi di habri scol cu tur trabou cu mester a wordo haci. "E no ta un situacion facil" Danker a admiti, indicando cu maestronan no kier traha den un situacion asina. E ta referi na e impasse cu tin na e scol entre directiva, unitmanagers y e maestronan. "Toch hopi di nan a coopera y vang op e studiantenan awe mainta" Danker a sigui bisa. 

CRITICA DI MAYORNAN

Algun critica di mayornan cu NoticiaCla.com a ricibi tabata entre otro cu ' EPI (tabata) rotzooi awe mainta. Ni 1ste jaar ni e hoger klas nan a wordo registra. Mayan tampoco. A bisa e muchanan bin dialuna pa 'wak' con ta bay haci. Ningun cos ta duidelijk awo ni pa mucha ni pa docent. Hopi tristo!!" 

REACCION DANKER

Danker a referi na e criticanan y a mustra cu no tur e critica ta corecto. "Bastante di e studiantenan a wordt opgevangen, informacionnan a wordo duna y afspraken a wordo haci". Tabatin algun caminda unda cu cierto informacion no por a wordo duna. Pero a palabra cu pa algun lo papia cu nan diabierna pa wak kico ta sigui. "E situacion no ta 100% cu nos ta bay ofrece y esey nos tabata sa!" Danker a admiti. Mes momento el a mustra cu por lo menos nan a haya nan studiegids, jaarkalender y a informa di e situacion un tiki fastioso y a desea nan un bon aña escolar. 

ROTZOOI NA EPI?

Riba e critica specifico cu EPI tabata un 'rotzooi', Danker a mustra cu tin cu corda cu e scol ta uno hopi grandi. Ta pone cu en berdad no tur hende a keda cla. "E situacion ta dificil pa duna precies kico e situacion tabata pa cada unidad. Esnan cu a palabra cu studiantenan pa ricibi nan lo haci tal, y otronan cu a bisa cu nan no ta cla, a bisa e studiantenan cu nan lo no por ricibi nan ainda. "Ainda nos tin cu papia cu nan. Nos lo bin bek riba esey y papia cu nan mayan" Danker a sigui bisa.  Ora cu traha cu 150 docente, y cada un tin nan opinion. Y como tal no kier a generalisa. 

SCOL TA HABRI DIALUNA NORMAL

E intencion ta pa scol habri dialuna awor. Si e maestonan no kier coopera, lo por tin un problema. "Nos ta depende di nan, pasobra nan ta esunan cu tin cu duna e lesnan. Si echt nan bay en bloc y bisa 'te aki nan nos a yega y no ta bay coopera, anto e ora nos tin cu informa e studiantenan, cu ta asina" Danker a sigui bisa. Pa aworaki, e situacion no ta mustra cu e lo bay den un direccion asina pa tur tur e studiantenan. Tin 4 unit, cu 4 diferente caracter y situacion. Tin docente cu kier coopera y tin docente cu no kier coopera y no kier traha den e situacion ey. "Mi no por dunabo un contesta concreto over di esey. Si mi kier bisabo cu nos a parti e roosternan cu e intencion pa cuminsa scol dialuna" Danker a finalisa bisando.