Rainbow Warriors kier revoca e ley all-inclusive si e pasa den Parlamento

ORANJESTAD - Rainbow Warriors International ta preparando proceduranan pa revoca e ley pa regula all-inclusive na Aruba si e amienda proponi di ordenansa nacional ser pasa pa staten. Diaranson 17 di augustus a entrega un carta na Staten notificando Parlamento di Aruba cu Rainbow Warriors Core Foundation lo invoca tur procedura, y medio legal disponibel tanto na nivel nacional como internacional pa revoca e ley intenciona pa regula all-inclusive na Aruba.

INTENTO MAL CONCEBI

E ley proponi cu ta un amienda di Vergunningsverordening ta un intento mal concebi pa regula un industria cu cada dia mas no por ser regula, ya cu cada dia mas e ta ser determina pa escogencia di e consumidor, technologia y trends nobo den viahe y turismo y riesgo global y inventarisacion di menasa cu ta impacta escogencia y opcion di tanto e viahero como e industrianan di biahe y turismo mes.

SALVAGUARDIA DERECHO Y LIBERTAD FUNDAMENTAL

Segun e NGO, den un pais democratico cu ta un estado di derecho, e organo legislativo tin e deber pa percura cu ta salvaguardia e derechonan y libertadnan fundamental y pa cualkier propuesta di ley no mishi cu e fundeshi di e estado di derecho, leynan local y tratadonan internacional vigente. " Por medio di e mandato duna na nos como defensor di derecho humano pa Naciones Uni y Union Europeo nos ta saliendo na vanguardia di tal derechonan y libertadnan" e NGO ta bisa den un comunicado. "Den wega ta e bienestar social y economico di henter e poblacion di e isla di Aruba, cual interesnan no ta ser sirbi cu e ley proponi pa regula all-inclusive, ya cu e lo destrui e unico pilar solido di nos economia, esta turismo" e organo ta finalisa bisando. Foto cortesia Hit94FM Johnny Habibe.