SIMAR ta cuestiona con directie EPI a trata welga di unit managernan

ORANJESTAD - E sindicato di maestro SIMAR ta cuestiona con directie di EPI a trata welga di unit managernan. Asina nan ta bisa den un comunicado. Segun e sindicato, en coneccion cu e welga di e managernan di Colegio EPI, directie di EPI a dicidi di manda un carta na tur docente supuestamente pa duna informacion y pa pidi sosten y cooperacion di docentenan pa asina habri e aña escolar manera planea.  SIMAR ta cuestiona e forma cu directie a scoge pa atende cu full e situacion, ya cu nan a dicidi di manda 4 carta y informacion personal di e Managernan cu ta regarda e caso abiertamente pa docentenan. 

MANDA INFORMACION PERSONAL

Mas aun SIMAR ta cuestiona e hecho cu Directie na un forma masha no profesional a opta pa manda informacion personal, entre otro salario di e managernan, publicamente den medionan di comunicacion. "Dicon directie no a informa e docentenan di cuanto nan mesun salarionan y nan toelage y beneficionan ta, pa asina cada ken por a saca nan conclucion?" e sindicato ta puntra. Cartanan cu a ser manda pa docentenan ta cartanan manda dor di DPS y di SIMAR pa minister y corespondencia entre abogadonan di SIMAR y di Minister. Un solo carta a ser dirigi c.c. pa Directie di EPI, pues SIMAR no ta haya na su lugar cu a dirigi tur e cartanan menciona na docentenan. Mester remarca cu e miembro di Directie cu a publica e informacion eroneo aki den diferente medio di comunicacion, mes tabata forma parti di e cuerpo di Managernan y a lucha pa e mesun derecho cu awe e ta cuestiona. 

MESTER ASERCA MANAGERNAN PA MAS INFO

SIMAR ta di opinion cu Directie como bon dirigente, mester a acerca e managernan pa mas informacion prome cu a haci e publicacion menciona. Un yamada pa reuni a sali despues cu ya tur docente y publico a ser informa, pa colmo cu informacion incorecto. E pregunta cardinal ta: cu ki meta Directie a tuma e paso aki, ya cu den bista di SIMAR no tabata tin ningun motibo balido pa haci esaki. Mas aun como Educacion Intermedio profesional, e accion aki no ta e mihor ehempel pa studiantenan di EPI. SIMAR ta kere den comunicacion habri, transparente, respetuoso y corecto.  

Banda di esaki SIMAR a haya informacion di docentenan miembro cu pa habri scol, Directie a opta pa duna studiante- y docentenan rooster bieuw, mientras tin palabracionnan na final di aña escolar pasa pa cambio riba esakinan. Tambe a ser pidi na docentenan pa adapta rooster entre otro, cu ta tarea di un Manager, ya pa tantisimo aña. Docentenan absolutamente no a acepta esaki. Tur e puntonan aki no ta na bienestar di enseñansa den EPI, ni na esun di docente- y studiantenan. Tampoco ta responsabel, segun SIMAR, pa habri scol sin e “leidinggevende”, esta e managernan presente na nan respectivo Unit, cu ta esnan cu finalmente ta responsabel pa e funcionamento y studiante di e scol presente. 

SIMAR no ta kere cu dos (of tres) persona por atende cu e situacion aki, cu ta encera al rededor di 1900 studiante y 135 docente (sin lubida e restante di personal cu tambe ta bou di nan liderasgo).