Consul General nobo di Merca a reuni cu Prome Minister Eman

ORANJESTAD – Recientemente Prome Minister di Aruba, mr. Mike Eman a ricibi na su oficina den sede di Edificio di Gobierno na Oranjestad, bishita di Sra. Margareth Hawthorne, Consul General nobo di Merca pa Caribe Hulandes. E encuentro aki a forma parti di un programa oficial di dos dia cu e diplomatico a tene riba nos isla. Ambos a pasa riba un lista amplio di topico basa riba e relacion largo y importante di cooperacion cu ta existi entre ambos pais.

REUNION POSITIVO

Consul Hawthorne a duna di conoce cu e reunion a desaroya di un manera sumamente positivo tocando puntonan mutuo di interes y reafirmando e lasonan excelente cu ta data di hopi tempo atras y ta contento cu e ta sigui asina. “Mi ta akinan pa tende y siña di tur loke Aruba ta haciendo y e iniciativanan tremendo manera esun di Prome Minister riba energia limpi pa cual mi ta hopi entusiasma y interesa,” e funcionario Mericano a comenta.

TRAYECTORIA DI HAWTHORNE

Margaret Hawthorne ta miembro di U.S. Foreign Service cu 25 aña di experiencia diplomatico. El a asumi su responsabilidad como Oficial Principal di Consulado General di US na Corsou y Hefe di Mision pa Caribe Hulandes na april ultimo. Prome cu esey, Sra. Hawthorne a fungi como director di e Crisis Management Training Division na e Foreign Service Institute na Washington DC y tambe tabata hefe interino di mision na Embahada di Merca na Belize. E ta un hurista di profesion. Esaki no ta sra. Hawthorne su prome bishita riba nos isla. Diescinco aña pasa el a conoce Aruba como pasahero di crucero. For di e experiencia ey e ta conta cu e ta corda con bunita e isla ta y e ambiente di bon bini di nos hendenan. “Esey no a cambia, pero mi ta hopi impresiona cu e otro cambionan cu a tuma luga na Aruba.”

APRECIA ASISTENCIA

E Consul General nobo di Merca pa Aruba a indica despues di su encuentro cu Minister President Eman cu “en berdad nos aprecia hopi e asistencia cu Aruba a duna nos den termino di contraresta contrabando, trafico di hende y ayuda pa ciudadanonan Americano cu ta nos prioridad; y tin hopi Americano cu ta bin Aruba y esey ta algo cu mi ta contento di bisa.”

TRABOU PA HACI

Adicionalmente, e diplomatico a menciona cu ta bay keda traha riba negoshi, inversion y cooperacion riba tereno di, entre otro, educacion ya cu tin un cantidad creciente di studiantenan Arubiano cu ta bay sigui nan estudio na Merca. “Nos kier continua cu e intercambio y oportunidadnan aki,” asina Consul General Hawthorne a finalisa bisando.