Minister Paul Croes na huramentacion presidente Dominicano Danilo Medina

ORANJESTAD – Diamars 16 di augustus ultimo a tuma luga e ceremonia di huramentacion di Danilo Medina pa su di dos termino como President di Republica Dominicana. Na e acto celebra den Congreso Nacional, a asisti 13 otro lider di Latinoamerica, Caribe y tambe Asia. Entre nan, Minister di Asuntonan Social, Hubentud y Labor, drs. Paul Croes a representa Pais Aruba.

Bisti na blanco, manera e protocol ta pidi, Minister Paul tabata compaña pa director di Departamento di Relacionnan Exterior, Edwin Abath y Embahador di Reino Hulandes na Republica Dominicana, Sra. Marijke van Drunen Little. E mandatario Arubiano a presencia no solamente e huramentacion di Medina y su Vice President Margarita Cedeño, pero tambe e institucion di Medina su Gabinete nobo di Gobierno.

E uzo di trahe blanco pa e tipo di ceremonia aki ta data for di tempo di e famoso lider Trujillo, kende tabata uza e traha blanco yama ‘Chaqué’ den dia y un trahe formal preto anochi. Cu paso di tempo e custumber a bay for di moda te ora cu ex President Balaguer a oficialisa esaki na 1973 designando e trahe blanco pa e lunanan di zomer y esun preto pa e lunanan di winter. E ceremonia di huramentacion di President di e nacion Dominicano semper ta cay den luna di augustus.

“Tabata sin duda algun un honor di por a representa Gobierno di Aruba na e momento importante aki den e historia y democracia di nos region. Di e manera aki nos ta consolida e lasonan historico, economico y cultural cu ta existi entre Republica Dominicana y Aruba. Nos ta desea President Medina, su Gabinete y e pueblo Dominicano tur clase di exito,” tabata e palabranan di Minister Paul Croes. E mandatario ta regresando e siman aki mes pa Aruba pa continua cu su labor.