Rapport BCA riba 'AI' ta favorece gobierno grandemente

ORANJESTAD - E rapport riba All Inclusive, presenta pa Banco Central manera por a spera, no a logra trece consensus entre politiconan di Aruba. Manera cu e ley a keda presenta den Parlamento, tabata visto cu e diferencia di opinion entre gobierno y oposicion a keda practicamente mescos. Dos dia prome cu e reunion parlamentario tuma lugar pa adapta e ley respectivo, NoticiaCla.com a pone man riba e rapport. Tin dos rapport, di cual uno tin 25 pagina y e otro 18. E prome ta un analisis di CBA pa loke ta e efecto di all inclusive (AI) na Aruba. E di dos ta un interpretacion di un bufete di abogado Hulandes riba orden di Banco Central. Esey ta midi e legalidad y su consecuencia pa e ley. Mester bisa cu den liña grandi, e rapport ta sali negativo pa e industria di all inclusive y positivo pa gobierno, aunke mester adapta algun puntonan legal prome cu por papia di un ley completo 'corecto'. Tin basta cifra y interpretacion di su efecto den e rapport, manera por a spera. Y aki cada politico ta interpret'e manera cu e ta haya ta bon. Mientras cu e puntonan positivo y negativo ta mas of menos mes hopi, nan ta cuadra grandemente cu e rapport emiti pa PWC algun luna pasa.  

KICO NOS TA SIÑA DI AI

Loke BCA ta mustra como punto cu ta siña di e investigacion, ta e.o cu AI ta domina e turismo cu ta basa riba pakete, di cual AI ta consisti di 1/3 parti. Uzando cifra di 2015, ta papia cu AI a genera 720 miyon na entrada. Mas punto positivo menciona entre otro pa turistanan AI, ta cu nan ta e grupo cu ta domina e trend di turista biahero, y ta grandemente danki na nan, turismo a wanta den temponan dificil di p.e. low season manera e shoulder season (periodo chikito cu hotelnan ta bashi of bayendo malo cu ta augustus pa october p.e). Nan ta cater tambe mas pa e bishitante nobo, y ta biaha mas den volumen y ta crea hopi negoshi pa operadornan di tur di e isla. 

NEGATIVO

E parti negativo tambe ta keda ilustra den e rapport. Turistanan all inclusive (AI) ta gasta menos, ta paga menos pa camber di hotel, pero ta keda si mas dia den hotel, no ta ofrece calidad, tin impacto negativo riba e economia, y turistanan AI tin tendencia di no bandona e hotel.Ademas, door cu e prijsnan di camber ta menos, e revpar (revenue per available room)  tambe ta menos. Tambe e no ta consistente cu e e marca di exclusividad manera un hotel transient (hotel no all inclusive) ta brinda. Y finalmente, un turista AI ta gasta menos den restaurantenan pafo di e hotel cu nan ta hospeda. 

ANALISIS LEGAL

Pa loke ta e analisis legal, CBA a incorpora e bufete Hulandes Allen & Overy pa evalua e aspecto legal di e ley. E bufete a analisa 4 punto di e ley. Entre nan e legitimidad pa por impone un limitacion di derecho di tereno eigendom pa futuro doñonan di all inclusive, e 'level playing field' entre esnan cu ta ofrece AI, e derecho cu e ley ta duna e minister minister pa actua, y finalmente si gobierno ta cumpliendo cu e principio di bon legislacion. 

CONCLUSION DI ABOGADONAN

E conclusion di e bufete en general ta positivo pa gobierno riba e ley aki. Mayoria di e puntonan di e ley, gobierno ta cumpli cune. Pero, tin camindanan unda cu gobierno mester adapta esaki pa evita problema legal despues. Entre e problemanan, gobierno por spera problema cu e tempo mara na e permiso y tin cu adapta esaki pa e funciona miho. E bufete ta dileña 3 punto cu gobierno mester atende cune pa evita mas problema, y esaki mester sosode en concordancia cu e grupo di hotel cu tin permiso di AI caba, y haci esaki tambe 'prome' cu e ley mes drenta den funcion. Ademas mester por incorpora e cambionan den e ley tambe. Algun punto cu gobierno kier impone, segun e bufete, no por wordo regla pa un landsbesluit sino mester bin den un otro forma di ley. Ademas gobierno mester duna mas claridad den cierto punto con y kico e kier logra cu cierto cambionan, pa evita problema despues. Fuera di esey, e bufete ta kere cu gobierno ta actuando corecto y cu si haci e cambionan neceasrio, e ley por funciona pa cu regulacion di AI cu gobierno kier logra.

REACCIONNAN POLITICO

Mesora tanto gobierno como fraccionan opositorio a reacciona publicamente riba esaki. Den caso di e mandatario di turismo Otmar Oduber, el a mustra cu e SWOT analisis di e raport di Banco Central pa cu all inclusive ta pa un 95% den liña cu esun di PWC cu a wordo entrega na Parlamento, Minister di Turismo Otmar Oduber a añadi, y cu ta importante ta pa nos para banda di interes general di Aruba. Den caso di lider di PDR Andin Bikker, e ta mustra cu miho Gobierno retracta e ley di all-inclusive, y cu e estudio di Banco Central ta confirma ponencia di PDR cu e ley actual tin su risiconan y cu eigenlijk un ley di competencia ta mas indica. Di parti di Evelyn Wever den su reaccion, ta conclui e.o. cu bo no por conclui cu "all inclusive" ta malo pa nos economia. Wever ta splica tambe parti di e interpretacion di e bufete di abogado y ta conclui e.o. cu C e ley NO ta bon! "Ken sa ta kico Otmar Oduber a compronde, ora ela bisa cu Banco Central a bis'e cu e ley ta bon" Wever ta bisa. 

Lesa e comentario completo di minister Oduber aki, di parlamentario Bikker aki, y esun completo di parlamentario Wever aki.