Island Gaming: Nos a manda proposicion pa FTA

ORANJESTAD - Mientras cu sindicato FTA ta wardando un fecha pa hiba e operador nobo Island Gaming corte, e operador no ta na altura di nada. "Nos a tuma nota den prensa cu nan ta hiba nos corte, pero no tabatin ningun comunicacion formal (riba e topico ey ainda)", e representante na Aruba a bisa NoticiaCla.com diaranson. "Nos a manda e sindicato un proposicion diabierna ultimo", e representante a sigui bisa. A mustra tambe cu e proposicion ta confidencial y lo no wordo discuti den media, pa cual mas informacion lo no wordo duna. Te cu awe mainta, no tabatin fecha conoci ainda pa trata e caso. 

CASO SUMARIO

Sindicato FTA ta wardando fecha pa corte trata e caso sumario cu nan a entama contra e operador 'bieu' di ex Aura Casino (TMRG NV) y e operador nobo (Island Gaming). E presidente di e sindicato Hubert Dirksz a informa NoticiaCla.com cu no tin fecha ainda pa e caso. "Nos a entama un kortgeding pa forsa pa e trahadornan wordo paga nan dianan di december pa awor. Ban wak kico lo t'e resultado" Dirksz a sigui bisa. E operador nobo no tabatin informacion ainda y ta pendiente pa duna informacion. 

INTENCION DI E CASO

Dirksz a splica cu en berdad a entama e caso contra dos operador, esta esun 'bieu' y esun 'nobo', y e motibo ta pa nan paga e trahadornan (loke nan debe desde december)."Pero nos sa cu hues lo bay mas leu pa haci esun nobo responsabel pa e relacion di trabou cu ta un derecho segun ley" Dirksz a bisa. E punto ta cu, segun FTA, si gana mes, si lo por bai cobra y si no por cobra, kier wak unda bay, kico por gara. "Pero esey nos ta sperando. Ohala cu nan paga y cu yega na un acuerdo pa e caso habri cu 25 trahador manera Island Gaming a informa" Dirksz a bisa finalmente. Representantenan di Island Gaming no tabatin comentario ainda y ta spera di por tin esaki mas despues. 

MENASA DI CASO

Tabata luna pasa cu FTA a menasa caba cu corte. " Of e operador nobo di ex Aura Casino ta honra peticion di FTA pa paga salario atrasa di e grupo cu no a wordo tuma, of FTA ta hiba e operador corte". Asina e presidente di e sindicato FTA Hubert Dirksz a bisa NoticiaCla.com luna pasa. Den mesun rosea sinembargo, Dirksz a mustra di tabata dispuesto pa 'hinca awa den biña' aunke no ta dispuesto pa bisa cuanto awa nan kier y por hinca. Hecho ta segun e sindicalista, cu e operador mester 'come across'. Asina simpel e situacion tabata e tempo ey. NOTA. Foto ta di e situacion actual di loke a keda di loke tabata Aura Casino