Oduber: Satisfecho cu presentacion di BCA rapport all inclusive

ORANJESTAD - Despues di 4 luna cu a entrega e cambio den ley na Parlamento diabierna awo ta trata e ley di All-inclusive. Den cuadro di esaki Banco Central a duna un presentacion na Minister Otmar Oduber. Fraccion di MEP y di AVP a haci un peticion na Banco Central pa traha un rapport riba e ley proponi di All-inclusive y tambe riba e impacto cu esaki lo por tin riba economia. Oduber a gradici Banco Central pa den un tempo asina corto a logra di crea diferente punto di referencia pa midi e conclusion di tur e rapportnan cu tin. World Tourism Organisation como tambe PWC ya caba a crea rapportnan riba e topico di All-inclusive y ATA tambe a laga traha diferente rapportnan local.  Den un forma no detaya pero mas bien global por a mira e impacto y efectonan cu tin den economia na momento cu e tipo di acomodacion tipo All-inclusive crece. Oduber a indica cu e rapport di Banco Central ta den liña cu locual e rapport di PWC y e otro rapportnan ta trece dilanti. "No por tin discusion riba e impacto financiero di un bishitante cu ta keda den un camber All-inclusive cu ta substancialmente menos cu esun di un bishitante cu ta keda den un camber tipo EP, esaki a keda demostra cu cifra y actualisa pa cu e situacion na Aruba." Oduber ta comenta.

RAPPORT EN LIÑA CU ESUN DI PWC

Segun Oduber, por nota cu a haci un intercambio di analisis den e rapport di Banco Central cu segun Minister Oduber ta un 95% den liña cu e intercambio di analisis cu a keda conduci pa PWC tambe. Banco Central na su turno lo publica e rapport aki y e mandatario ta spera cu esaki sosode pa e reunion di diabierna awo tambe. 

PONE RAPPORT BANDI OTRO

Diabierna durante e tratamento di e ley di All-inclusive den Parlamento di Aruba tur miembro di Parlamento lo por pone e rapportnan banda di otro y mira pa nan mes cu e rapportnan conclusion ta practicamente identico unda e cifranan cu ta presenta ta mustra kico ta e debilidad y kico ta e forsa, e oportunidadnan di un industria cu ta depende di All-inclusive por trece dilanti.