Richardson: Cuerpo policial por adapta facilmente den tur situacion

ORANJESTAD - Aruba tin un cuerpo policial cu sa con pa adapta rapidamente den tur situacion. Esey ta un di su puntonan fuerte, segun alto comisario di polis Dolfi Richardson na NoticiaCla.com. Na ocasion di e 30 aniversario di e cuerpo, Richardson a splica algun di e puntonan di preocupacion, pero tambe di logro cu e cuerpo a pasa aden, primordialmente durante su tempo como hefe maximo di polis. En general, Richardson ta contento con cos ta bayendo. Berdad cu antes cos tabata otro den e cuerpo, pero tempo ta cambia y esey ta un hecho segun e comisario. 

CUERPO CU POR IMPROVISA

Loke cu Richardson ta tipifica e cuerpo, ta e flexibilidad cu e cuerpo tin. "Nos por adapta nos situacion. Esey ta un cos cu mi a siña di nos cuerpo. E ta un organisacion cu por improvisa" Richardson a sigui bisa. Ningun situacion ta igual y cada bes ta adapta den nan 'approach', y esey ta un di e cosnan miho cu Richardson ta sinti di su cuerpo. Di otro banda, e ta sinti cu nos mundo ta emancipando y hopi biaha Richardson ta haya critica di hobennan polis mas parti cu no sa con pa anda cu publico. "Esey ta e challenges cu nos tin cu traha cu ne". Aki ta unda cu scol di polis ta un instituto importante pa sigui forma y guia e muchanan cu ta bay pa bira polis, segun Alto Comisario.