Proyecto “Bon Bista” a haci impacto den e bida di e muchanan

ORANJESTAD - E ultimo simannan Kiwanis Club of Aruba tabata activo cu ehecucion di diferente proyecto, unda cu e miembronan a demostra cu di curason nan mision ta pa haci un impacto den e bida di e muchanan na Aruba. Un di e proyectonan aki ta ‘Bon Bista’ cu a duna e oportunidad na un grupo di mucha, pa haci examinacion di nan bista y p’esnan cu tabata tin e necesidad di un bril, haya esaki como regalo di cortesia di Optica Sun Specs.

E miembronan di Kiwanis Club of Aruba, durante tres diasabra consecutivo for di mainta tempran, a duna acto di presencia pa yuda cu e muchanan, cu a ricibi un desayuno, na momento cu nan a yega Optica Sun Specs na Super Food Plaza. 

Despues cu nan bista a wordo examina pa e grupo di experto di e optica, nan a pasa scoge e montura di nan gusto, for di e seleccion grandi obtenibel den e coleccion di bril di mucha. Sigur esaki tabata un di e momentonan cu mas e muchanan a encanta, ya cu hunto cu e ayudo di, entre otro; e President di Kiwanis Club of Aruba, Marjory Clark, nan a haya conseho, cua bril ta pas mas cu nan cara y personalidad. E satisfaccion di mas grandi tabata pa mira e sonrisa y cara di alegria refleha den e spielnan, ora e muchanan tabata wak nan mes cu nan bril.

Prome cu a hiba e muchanan bek cas, nan a disfruta di un lunch tambe, ofreci pa Kiwanis Club of Aruba y nan a gradici, dunando un man na e miembronan presente y na Greg Johnson, Managing Director, di Optica Sun Specs. Despues di e exito grandi di e proyecto ‘Bon Bista’ ya nan tin e compromiso caba pa otro aña cu e muchanan di Aruba. 

Kiwanis ta un organisacion global di boluntario dedica na cambia mundo via un mucha y via di un comunidad cada biaha y tin como lema: sirbiendo e muchanan di mundo. Kiwanis Club of Aruba ta activo den e comunidad Arubano desde 1964. Pa mas informacion di Kiwanis Club of Aruba y of su actividadnan por acudi na www.kiwansaruba.org of Facebook page Kiwanis Club of Aruba. Tambe por bishita e website di Kiwanis Internacional na www.kiwanis.org.