Risico pa Aruba wordo afecta cu virus Ebola ta minimal

ORANJESTAD – No tin ningun caso di e virus Ebola na Aruba. Y e risico pa Caribe ta minimal segun Pan American Health Organisation y World Health Organisation. No obstante e hecho tur esey, Departamento di Salud Publico di Aruba diahuebs atardi a mustra cu nan ta haciendo tur lo posibel pa evita e chens minimo pa e virus aki yega Aruba. “Nos ta trahando segun nos plan nacional di preparacion cu ya a wordo uza den pasado pa otro malesa”, Eugene Maduro di e departamento a bisa diahuebs.

Loke tambe a haci, ta duna un splicacion riba e situacion di e virus Ebola. E ta un un malesa infeccioso, cu actualmente ta na Africa Central y West Africa. E virus di Ebola ta infecta y causa morto di varios persona na Nigeria, Guinea, Liberia y Sierra Leona. Segun DESPA, ultimo reporte di World Health Organization (WHO) --11 augustus 2014-- tabatin 1975 caso confirma cu virus di Ebola y 1069 caso di morto den e region aki.

Virus di Ebola ta procedente di e selvanan di Africa, di cual su portador natural ta e raton di anochi cu ta -comedo di fruta- (Hypsignatus monstrosus, Epomops franqueti y Myonycteris torcata) y nan huesped natural ta entre otro macaco, chimpanse, gorila, porco spina y porco salvahe. Hende ta un huesped accidental.

E modo di transmision ta via contacto directo cu slijm y otro likido di curpa of secrecion manera af (pupu), orina, sanger, scupi y semen di un persona of animal infecta bibo of morto. Otro modo di transmision ta via contacto sexual y comemento di carni curu of semi curu di animalnan di selva cu ta infecta. E virus aki no ta wordo transmiti via contacto social (duna man) ni tampoco via sangura, awa, cuminda of aire.

Una bes cu un persona keda infecta, e virus ta reproduci den su curpa pa un periodo entre 2 pa 21 dia, cu’n averahe di 8 pa 10 dia (periodo di incubacion). Durante e periodo di incubacion e persona no ta sinti nada y no tin riesgo pa transmiti e virus pa otro hende. Despues cu e periodo aki a pasa, ta desaroya e sintomanan y ta bira contagioso. E sintomanan ta: keintura halto, dolor di cabes, dolor di musculo y jointnan, dolor di garganta y ta sinti debilidad intenso. Ademas lo por presenta diarea, sacamento, rash, dolor den pecho y tripa, bahamento di peso, higra y riñon lo por keda afecta y lo por presenta sangramento paden di e curpa y via boca, wowo y horea.

No tin tratamento specifico pa infeccion cu e virus di Ebola. Unabes cu un persona presenta e sintomanan mester di ayudo medico urgente y ta rekeri isolacion. Pa personal medico y/of famianan di un pashent infecta ta rekeri e medidanan di proteccion special y di higiena. Organisacion Mundial di Salud (WHO, PAHO) y Caribbean Public Health Agency (CARPHA) ta bisa cu no tin ningun caso di Ebola confirma den Caribe y en general e riesgo pa por contagia cu e virus di Ebola den e region aki ta keda hopi abou. Pero nan ta recomenda pa tur pais na mundo tuma e medidanan di vigilancia pa detecta, preveni y contene e entrada di e virus aki. Departamento di Salud Publico di Aruba . Pa mas informacion por tuma contacto cu Departamento di Salud Publico, Seccion Malesanan Contagioso na 522-4200/522-4221/522-4239.