Elias: Evaluando maneho pa concierto gratis CNSJ pa otro aña

WILLEMSTAD - E concierto gratis di Curacao North Sea Jazz ta continua otro aña normal. "Loke ta cambia ta e proceso di duna carchi". E propietario di e festival na Corsou Gregory Elias recientemente a sinta cu Noticiacla.com pa un entrevista exclusivo na su oficina na Landhuis Joonchi y a confirma y clarifica e asunto.  NoticiaCla.com a puntr'e riba e confusion cu a surgi, y e rumor cu lo elimina e concierto gratis otro aña. Tur pa motibo di e 'bululu' cu a surgi cu e reparticion di carchi gratis.

KICO A SOSODE

E informacion cu tabata circula, ta papia di cu gobierno (di Corsou) lo tabata disgusta cu e fundacion Bon Intencion pasobra nan a tene e mainta di parti carchi pa e festival, riba e mesun mainta cu gobierno a tene e ceremonia protocolario relaciona cu dia di bandera di Corsou na BrionPlein. Como tal hopi hende lo a opta, segun gobierno, pa bay para den rij pa busca carchi pornada en bes di asisti na e evento di gobierno. Esey lo a pone cu e organisadornan di e festival lo a disgusta y bay asina leu di bisa cu nan lo cancela e concierto gratis (di diahuebs) otro aña completamente. 

E REALIDAD

Combersando cu Elias y su di dos persona encarga (e.o) cu e evento di e reparticion di carchi e dia ey, Sigmund Jansen, nan a clarifica cu no ta gobierno tabata esun cu tabata contra di e evento. "Mi ta kere un representante di gobierno (lo) a vocifera cu mester a busca un datum otro pa organisa reparticion di carchi pornada" Elias a bisa. "Kiermen, no ta gobierno di Corsou sino un representante". E ta un fout cu un hende a bisa algo, y Elias a prefera pa laga e cos muri. Ta mustra cu e dia ey tabatin por lo menos 10 pa 15 otro evento cu a tuma lugar na e momento ey. "E meneer cu a papia, a bisa cu nos a secuestra e dia di bandera" Elias a sigui bisa. Algo cu e ta desmenti completamente.  "Porta reparticion di carchi tin cu bay otro. E (anochi pornada) ta keda!. Pero e reparticion ta bay otro. Si tin hende cu tin un idea, e por bis'e, y nos ta purba cambi'e. Nos tin cu mira e organisacion di tur hende si nan tur por haci'e si" 

TRES AÑA TA PARTIENDO CARCHI GRATIS 

Jansen na su turno a mustra cu e organisacion tin tres aña ta repartiendo carchi pa e concierto gratis riba e mesun fecha cu ta 2 di juli. "Den pasado nunca nos a haya un que otro remarke. Anto banda di esey 90 dia antes di e dia nos a anuncia cu nos ta bay parti carchi dia 2 di juli. Dus si tabatin un otro critica, lo mester a bisa nos 60 of 30 dia prome, no un dia prome" Jansen a bisa. E ta mustra cu semper tur cos a bay bon. 

CORSOU A HAYA E MENSAHE 

E prome anochi, cu ta esun pornada ta netamente pa esnan cu no ta bay of no por bay e otro anochinan, pero cu toch por enjoy e festival y mira kico e ta come y bebe di dje. "Ta logico cu mas hende ta asistiendo aworaki na e otronan. Ora cu nan bay e diahuebs, nan ta haya mira con bon e ta organisa y (sinti) e dushi di e festival y nan ta cumpra un diabierna y diasabra", Jansen ta sigui bisa. Pero den mesun rosea, Elias ta sigura cu no ta e intencion pa gara hende asina pa bay e festival completo. "No ta bay pa esey si. Ta bay pa hendenan cu no por afford. Ta p'esey nos ta parti 5.200 carchi local pa hende no por afford" Elias ta bisa. E ta admiti cu no por midi esnan cu a haya carchi, si ta pasobra nan no por a afford e anochinan otro. Mes momento ta bisa si cu esnan cu cumpra un package di tur dos dia regular di concierto, ta haya un carchi pornada di diahuebs. "P'esey tin un maximo di 12 mil hende. Anto di e 12.000 hende, 50% por ta di afo tambe. Bo ta haya tres ticket , y bo ta paga pa dos. Elias a enfatisa cu no ta pasobra e concierto di diahuebs ta pornada, cu ta pone 'cualkier cos toca'. "Nos no ta buta un cos pornada pa tira un para!" Elias a finalisa bisando.