Minister a acepta pa sinta cu Simar y EPI diaranson

ORANJESTAD - Sindicato SIMAR, Unit Managers di EPI y minister di enseñansa Michelle Hooyboer lo topa otro diaranson atardi. NoticiaCla.com a haya confirmacion cu e mandatario a acepta e invitacion haci na su persona diamars, y mirando e situacion a dicidi di actua. 

INVITACION HACI

Tabata e directiva di SIMAR cu a tuma nota den un comunicado di prensa di diamars, cu Hooyboer-Winklaar a declara di ta dispuesto pa sinta na mesa bek cu Managernan di EPI y SIMAR. A base di e declaracion aki SIMAR hunto cu su miembronan, e managernan y su abogadonan a manda un invitacion pa reuni urgente cu Minister diaranson 2:00 pm na cede di SIMAR. E mandatario a acepta e invitacion pa reunion, pero pa 3'or segun NoticiaCla.com tin informa. E meta di e reunion ta pa e.o.directiva y managernan di EPI haya contesta concreto riba nan puntonan pa asina nan por saca nan conclusion y por pone punto final na e problematica aki, pa nan por sa si y sigui cu nan tareanan diario. 

ORARIO DI APERTURA

Mientrastanto, directiva di EPI a manda un comunicado atrobe diamars pa recorda tur hende riba e fechanan siguiente cu ta trata apertura di aña escolar. Diahuebs 18 di augustus e studiantenan ta wordo spera na nan unit pa haya mas informacion tocante rooster riba e siguiente orarionan. Unit C&T di 8am pa 10am; Unit Economia di 9am pa 11am; Unit H&T di 10am pa 12pm y Unit S&S di 11am pa 1pm. Aki a mustra cu diahuebs 19 di augustus ta un dia di preparacion pa docentenan, pues no lo tin scol pa studiantenan. Dialuna 22 di augustus scol ta cuminsa segun rooster.