Preocupacion di un mayor di un studiante

Danki pa permiti mi e espacio aki pa trece mi preocupacion y mi pregunta dilanti.

Di dia cu mi persona a ricibi e brochure di ARUBALENING 2016-2017 tin algo cu mi ta sigur cu no ta cerca mi persona so esaki a lanta preguntanan, pero cu tin hopi mas mayor y studiante cu lo desea un aclareacion riba dje.

Dia 12 y 13 juli 2016  studiantenan cu a bay Hulanda a firma nan contract cu gobierno di Aruba pa cu e ARUBALENING. Dia 25 juli 2016 ami como mayor a ricibi e brochure cu e number personal di mi yui pa cu ARUBALENING  debi cu mi yui ja tabatin casi 1 luna caba na Hulanda. Ora mi a pasa den esaki mi a tuma nota cu tin un suma di Afl. 1100,= ta wordo kita pa seguro. Mi a bel onderwijszaken pa verifica si berdad e suma aki a wordo kita di e PRESTAMO pa seguro. Mi persona a wordo informa cu si y cu ta obligatorio pa tur studiante cu a hasi e prestamo aki. Esey a laga mi cu asombro debi cu durante e anochi informativo pa studiante y mayornan tocante “studielening” a wordo bisa cu masha enfasis cu seguro via INSURE TO STUDY no ta obligatorio. Mi a bay riba e site di e seguro ariba menciona pa busca informacion y mi a haci un calculacion. 

Seguro MASTER PLAN di INSURE TO STUDY esun di mas caro y amplio ta € 1,21 pa dia.

ARUBALENING ta segura studiante di 30 juli pa 31 december 2016 cual ta 185 dia. 

Koers laga nos tum'e manera eta ultimo lunanan.

185 dia X  € 1,21 => € 223,85 X 2,00 => Afl. 447,70.  ARUBALENING ta kita Afl. 1100,= cual ta un diferencia di Afl. 652,30.  E suma aki multiplica cu 210 studiante cu a bay Hulanda dia 30 juli ultimo (sin conta esnan cu a bay prome of despues) ta yega na e suma di Afl. 136.983,=. Kico nan ta bay haci cu e suma aki of kende(nan) ta beneficia di e suma aki? E todo caso NO ta e studiantenan cu ta hasi un PRESTAMO y despues tin cu paga esaki bek cu INTERES.

E studiantenan tin cu set up na Hulanda y di cada euro cu nan tin extra sigur nan por haci bon uzo di dje. 

Irena Geerman