Reunion entre Unitmanagers y docentenan di EPI diamars pa sosten

ORANJESTAD - Den un reunion programa pa diamars mainta, e unit managers di EPI y sindicato SIMAR kier informa e docentenan di EPI riba e situacion. A compronde cu e intencion ta pa door di suministra nan cu e informacion, cu e docentenan por bay na banda di e unit managers y asina haya un 'draagvlak' mas grandi pa nan causa. Esaki pasobra tin indicacion cu esaki no ta e caso ainda. E reunion aki ta programa pa tuma lugar diamars mainta. NoticiaCla.com a compronde cu si unitmanagers haya e docentenan na nan banda, e problema por escala pasobra esey lo por causa un problema real pa apertura di aña escolar. Sin sosten di e maestronan, e forsa di e unitmanagers lo ta mas chikito. Mientrastanto no tin indicacion cu lo tin caso den corte, y e welga di e unitmanagers ta continua. E siman aki alumnonan a haya yamada pa bay scol normal y atende cu nan schedule di reunion. Riba e facebook page di EPI, tin informacion corespondiente pa e alumnonan di e scol. Scol ta poni pa habri dia 22 di augustus proximo. 

WELGA

For di siman pasa, e unitmanagers a bay den accion, cu sosten di nan sindicato SIMAR, unda cu nan ta frustra e intencion di scol pa habri porta normal. Door di no haci nan trabou y no coopera cu e scol, nan ta mustra cu nan por stroba e apertura aki y cu asina nan por haya atencion pa un problema cu ta data di varios aña atras. Dialuna a habri cu e accion keto bay vigente y sin fin na bista. E unitmanagers ta bringando pa nan derecho pa loke ta nan trabou y salario y ta sinti cu nan ta wordo manda di cashi pa muraya y a bisa awor cu ta basta. Ta trata di un total di 7 pa 9 persona cu tin cierto funcionan clave na e scol.