No ta cambia fecha pa trata di ley di all inclusive y burgerlijk wetboek

ORANJESTAD - E tratamento di ley di all inclusive ta keda dia 19 di augustus proximo, esta diabierna awor. Den un carta pa lider di fraccion Rene Herde, presidente di Parlamento Marisol Lopez Tromp a para ariba cu e fecha(nan) no ta cambia.  A pidi pa cambia e fecha di tanto e reunion di e ley di all inclusive y esun di Codigo Civil, cu ta planea riba dianan 19 y 22 di augustus respectivamente. "Considerando e embergadura y contenido di e 2 leynan pendiente pa trata, como voorzitter mi ta mantene e fechanan manera nos tin nan planea y palabra na Staten" Lopez a bisa Herde den e carta recientemente. Den e carta cu ela manda pa Herde, e ta motiva su desicion mas aleu. 

PETICION DI HERDE

Mientras cu Herde no ta haci peticion oficial pa cambia e fecha di e reunion di Codigo Civil, ta bira obvio cu si hala esun di 19 di augustus pa 22 di augustus, esun ey mester move tambe. "Pa medio di esaki y den nomber di fraccion di AVP, mi ta propone pa fiha un fecha nobo pa e Reunion Publico riba e concepto di ley pa regula hotelnan "All Inclusive" na Aruba" Herde ta bisa den un carta pa e presidente di Parlamento. Un di e motibonan duna ta cu falta informacion, y cu no tin suficiente hende debi cu nan ta di biahe. "Pa un reunion asina importante manera e tratamento di e concepto di ley pa regula hotelnan "All Inclusive", ta necesesario pa tur miembro di Parlamento ta presente pa participa" Herde ta bisa. Informacion cu NoticiaCla.com tin, ta cu for di fraccion di AVP, tin por lo menos 4 persona cu ta reserva pa representa e fraccion di e partido berde na Panama entre diaranson y diabierna awor. Di otro banda, NoticiaCla.com a tende cu ningun hende di AVP ta bay, y ta solamente un parlamentario ta confirma pa bay, cu ta Glenbert Croes di MEP. Pero for di lider di fraccion di MEP Evelyn Croes, e no por a confirma si enberdad Croes lo biaha. NoticiaCla.com a busca contacto cu tanto lider di fraccion di AVP Rene Herde y Evelyn Croes. Pero Herde no a reacciona (ainda). Croes si tabatin su reaccion. 

REACCION EVELYN CROES

Wever Croes a mustra cu nan ta preparando pa e reunion di diabierna awor, maske nan no sa con e lo bay si e fraccion di AVP no por duna quorum na e reunion. "Mi ta keda di opinion si cu e ley di all-inclusive no por wordo  trata, pa diferente motibo" Wever ta bisa. Segun Wever, pa prome, e minister a scohe un forma ilegal pa regula e all-inclusive. "Na di dos lugar, nos a pidi pa haya e rapport di PWC, pero te dia di awe e minister ta nenga pa duna nos y sin e rapport ey nos no por trata e ley. Y na di tres lugar, Banco Central ta haciendo un investigacion di e impacto di all-inclusive na Aruba. Pa Parlamento e investigacion ey di Banco Central ta hopi importante. E no ta cla ainda y p'esey nos ta di opinion cu ta iresponabel pa trata e cambio di ley awor ainda, pero mester warda e resultado di e investigacion di Banco Central" Wever a sigui bisa. " Nos ta di opinion, mescos cu e minister, cu nos no kier pa Aruba bira "one all-inclusive island", pero e forma cu e minister a scoge ta ekiboca y lo hinca e minister y e industria turistico den hopi mas problema. Turismo ta nos unico pilar economico. Nos mester trat'e na forma mas responsabel" Wever a bisa.