De Sousa ta entrega amienda 'adapta' diamars na Parlamento

ORANJESTAD - E amienda cu parlamentario Desiree de Sousa Croes a presenta algun siman pasa pa wordo trata otro siman den Parlamento durante e tratamento di e proposicion di cambionan den e ley di Codigo Civil (Burgerlijk Wetboek), a wordo adapta. "Mi lo cambia e amienda p'e ta mas duidelijk cu e no ta encera matrimonio homosexual" de Sousa a confirma na NoticiaCla.com dialuna. "E cambio ta haci, y lo entrega mayan" e parlamentario pa e fraccion berde a sigui bisa, refiriendo na diamars. Segun de Sousa, nunca tabata e intencion pa encera matrimonio homosexual. "Esey no tabata e intencion prome y no ta e intencion awo tampoco" de Sousa a bisa. Pero, segun e parlamentario, aparentemente ta necesario pa formula e idea di matrimonio un bes mas . "Pa mi no ta problema pa ta mas cla posibel. Pa mi, e tabata cla for di comienso, pero pa otronan mas claridad ta parce necesario" de Sousa a finalisa bisando.

E CASO 

Ora cu e parlamentario a presenta e amienda inicial, esaki a crea un problema serio, sigur den su propio partido y tambe clero. Discusion fuerte tabata bay y bin, unda cu tabatin te hasta peticion pa pastoor cambia tono di su predicashi riba e tema. Division den e partido tambe no a yuda e causa y tabata bisto cu e partido tabatin un problema serio cu e tema aki. Evaluando tur e puntonan aki, de Sousa a opta pues pa ahusta e amienda y wak si asina si e tin aceptacion di tur colega pa wordo trata otro siman dialuna. 

PETICION PA CAMBIA E FECHA

For di e propio fraccion a bin peticion pa cambia e fecha di e tratamento pa otro dia, mirando cu kier a uza e fecha ey pa trata e ley di e reunion di ley di all inclusive. Pero den un carta pa e lider di fraccion di cual de Sousa ta forma parti, a mustra cu esaki no ta bira e caso y cu dia 22 di augustus ta trata e cambionan proponi den e ley di Codigo Civil Burgerlijk, unda cu tambe lo trata e amienda di de Sousa.