CAft: Gran parti entrada 2017 di gobierno basa riba reapertura refineria

ORANJESTAD - Mientras cu gobierno ta basa un gran parti di e prespuesto 2017 su entrada na e reapertura di e refineria, College Aruba Financieel Toezicht (CAft) tin otro idea. Den nan ultimo rapport, CAft ta ripara cu gobierno ta sali di e punto di salida cu 'e reapertura di e refineria (den fase) lo duna un impulso substancial na economia di Aruba', y consecuentemente tambe na caha di gobierno. Segun CAft, gobierno ta papia te hasta di un crecemento nominal di e PIB di 6.1% pa 2017. Mirando cu ainda tin incertidumbre riba e deal cu Valero, CAft dificilmente por calcula e efectonan cu e reapertura lo por tin financieramente pa nos isla. "Haci un declaracion riba e consecuencianan financiero di e reapertura ta rekeri precaucion y cuidou' CAft ta bisa. Den e relato aki NoticiaCla.com ta toca un parti di e relato recien. 

PRESUPUESTO 2017

Loke cu CAft ta lamenta, ta cu den e concepto di presupuesto, gobierno no a pone e estimacion di gastonan relaciona cu e reapertura. "E punto di salida di gobierno ta cu tur gastonan (no premira) y inversionan lo wordo carga pa CITGO. Tambe ta mustra cu no ta mucho cla cua parti di e aumento di entrada na belasting, lo ta a consecuencia di e reapertura di e refineria. "Como tal, bista completo y oportuno di tur analisis di risico cu Aruba ta pone hunto cu CITGO, ta di esencial importancia" CAft ta finalisa bisando.