Dolarisacion pa Aruba no ta na discusion segun Banco Central

ORANJESTAD – Dollarization na Aruba no ta na discusion aworaki. Por lo menos no segun economista Giancarlo Croes di Banco Central di Aruba. E encuesta proximo riba e dolarisacion, ta simplemente pa haya un impresion di cuanto dollar ta circula na Aruba. Mes momento a confirma cu e florin su balor ta stabil y no tin ningun indicacion cu e lo ta den peliger. De hecho segun Croes, si ta asina mes cu ta pensando pa cambia moneda di Aruba di florin pa dollar, e decision lo bin di mas ariba, indicando cu e ta un decision politico y no uno di banco central di Aruba.

E pregunta a surgi momento cu Croes, hunto cu otro economistanan Rendell de Kort y Jonathan Upegui a informa cu pa un periodo di 3 siman, lo tene un encuesta riba e tema di dolarisacion y cu e ta auspicia pa Banco Central. Esey a crea mesora e pensamento cu esaki ta parti di un ehercicio na caminda pa un posibel evaluacion di cambio di moneda.      Bonaire, cu cambio di su status na 2010, a cambia di florin pa dollar na 2011.

Durante e periodo di 16 di augustus pa 7 di september 2014, un total di 5 persona (contrata pa banco central) lo encuesta un total di 400 persona riba lugarnan strategico na Aruba. E persona encuesta lo tin cu contesta 26 pregunta relata na e uso di valuta cu no ta e florin, door di e residentenan di Aruba. E proposito principal ta pa midi e nivel di ‘cash dolarisacion’ di e poblacion arubano, y pa midi e magnitud cu ta circula banda di e florin den e economia arubano. A sigura cu e resultado di e encuesta aki lo ta estrictamente confidencial y lo publica e resultado ‘solamente den un forma agrega’. E siguiente paso lo ta pa encuesta comercio riba e topico aki. No ta conoci ki tempo esey lo sosode, pero ta purba haci esaki ainda prome cu fin di aña 2014.