Unitmanagers y directiva EPI ta keda para riba nan punto

ORANJESTAD - Siman a habri manera cu ela cera pa loke ta e situacion na EPI. Den fin di siman tanto directiva como e grupo di unit managers a expresa nan punto categorico un biaha mas. Directeur Bedrijfsvoering di Colegio EPI, Anky Danker y Directeur Onderwijs, Irayka Yanez a confirma den fin di siman cu 'cu no obstante e declaracionnan di parti di e grupo di Unit Managers di Colegio EPI, e scol lo ricibi su studiantenan dialuna, dia 22 di augustus'. Y di parti di e grupo di unitmanagers, nan tono tampoco no a cambia. 'E welga ta sigui entrante dialuna, augustus 15 y te ora minister dicidi cu e kier sinta cu nos na mesa pa dialoga di un forma habri y cu e intencion di negocia. Of manera den su mesun palabranan nos ta bisa e manda nos hues pa nos bay traha. Nos lo ta sigur cu hues lo ta interesa pa tende tur e desafionan cu tin den EPI' e comunicado di e unitmanagers a indica. Sinembargo, riba esaki directiva tambe a mustra cu 'directie di scol no ta tuma pasonan legal pasobra nan mester papia prome cu Dienst Publieke Scholen, cual ta e organisacion bou di cual Colegio EPI ta resorta, pa mira con pa resolve e situacion'.

SITUACION ACTUAL

Ademas e directiva, segun nan comunicado, ta referi na e situacion actual cu a surgi, ' como un situacion cu tin 10 aña caba andando'. E organogram di e scol no tabata completo y tampoco a wordo formalisa, esaki a resulta cu tin retonan cu e compensacion, o sea e “salariering” y e “toelagenan” pa e managernan di e diferente unidadnan. E directornan a splica cu e situacion a wordo presenta na diferente Minister caba y na momentonan aki por bisa cu simplemente el a “loop uit” y aunke tin procesonan andando rond di henter e organisacion, esta e “functiehuis” di Colegio EPI, e unit managers a dicidi di bay den accion. Den transcurso di e mas di 10 aña cu e asunto aki ta andando, a keda manda carta, segun un di e directornan.

SITUACION DI MINISTER

Segun directiva, e Minister a palabra cu lo bin cu un investigacion pa loke ta trata e structura di organisacion di e scol y despues lo tuma otro decisionnan. E investigacion aki lo mester a tuma luga aña pasa, pero como cu tabata den proceso di formalisacion di e descripcion di funcionan di tur persona cu ta emplea pa traha na EPI, a tuma e decision pa haci esey un prioridad. E directornan ta bisa cu entretanto a “beschrijf” EPI como organisacion y tur e funcionnan a haya nan descripcion formal; e documento aki ta den proceso di aprobacion. Nan a splica cu entre e unit managers y instancianan manera e sindicato di maestro SIMAR, DRH (Departamento di Recurso Humano), huristanan y  DPS (Dienst Publieke Scholen), diferente reunion a tuma luga encuanto e situacion di e salarionan. E managers a haci peticion pa cierto cambio den e structura y a papia tocante di e posibilidadnan.

E PROCESO

E procesonan, segun e diretiva, ta riba bon caminda. Mirando e punto di bista di e managers, nan ta den welga awo cu nan pone nan trabou abou, sinembargo e directornan kier pa scol cuminsa manera palabra y segun e programa di aña escolar. E studiantenan ta nan prioridad y nan no kier pa e studiantenan bira e victima di e situacion andando. E directornan ta buscando un manera mas eficiente con pa cuminsa scol riba e fecha stipula y cu e problema cu e managers haya un solucion cu ta “win-win”.

REACCION UNIT MANAGERS

Fuera di e loke cu unit managers a bisa, nan a mustra tambe cu 'na momento cu Minister bisa A e mester bisa B tambe. Adhunto nos ta manda boso 3 comunicado di prensa cu ta duna un splicacion den corto di kico e problema ta cu a cuminsa desde 2004'. Segun e unit managers, desde 2014 a bin ta negocia cu e minister aki, cu ta e di tres (anteriormente Marisol Lopez Tromp, Arthur Dowers) y un sin fin di "expertonan" di gobierno sin por a yega na solucionnan structural y concreto. Nan ta sinti cu driemaal is scheepsrecht. 'Nunca e tabata e expectativa pa resolve e problema aki den un solo biaha. Al contrario nos como unit managernan ainda ta bereid pa traha ariba un solucion structural y nos ta consiente cu e implementacion di esaki lo por dura un par di aña promer cu e keda finalisa'.

Segun e unitmanagers, na mei, ora cu nan a pidi pa sinta cu minister un biaha mas ela indica na nos di por cumpli cu un di nos 3 peticionan y aunke e no tabata e suma verwacht nos a dicidi pa tira awa den biña. De hecho a opta tambe pa bay met terrugwerkende kracht te cu solamente 4 aña y no 10 aña cu ta locual ta nos derecho. Dus e unit managernan tabata y ainda ta dispuesto pa sigui dialoga y yega na algo concreto.

Sinembargo na mei ultimo tambe minister a bisa tur unit managernan cu te aki ela yega y cu e no por duna nos nada mas y cu si nos no ta di acuerdo of contento nos mand'e hues pa busca nos derechonan. Esaki sabiendo cu si nos bay corte e ta bay ta un proceso cu lo dura entre 2 pa 3 aña atrobe y cu nos ta mira como tactica pa retrasa e proceso un biaha mas.

Na juni a manda un carta pa minister indicando su persona over di zorgpunten pa habrimento di e aña escolar 2016-2017 cu a inclui e "unfinished business" aki di unit managernan y tambe e hecho di cu e esfera di trabou na EPI ta seriamente afecta pa motibo di e beroepshouding di entre otro e Algemeen Directeur. Varios keho oficial di tanto docente como unit managernan a wordo entrega contra su persona, te hasta sindicatonan TOPA y SIMAR a expresa nan preocupacion over di su houding, pero te cu aworaki nada a wordo haci. E ambiente ta uno hostil, desagradabel y na cualkier momento por bira uno explosivo. Den juli minister a manda contesta bek cu un carta uzando palabranan di cu "lo bay traha riba dje", "mester dialoga over di e asunto", "pronto lo tin un solucion".  

"Den un ambiente di trabou desagradabel, caminda no tin claridad, no tin solucion pa problemanan structural y di maneho ta locual nos Minister di Educacion kier pa sigui ta e realidad pa e aña escolar nobo. Y p'esey tambe nos a indica na su persona cu nos ta riba welga. Su reaccion ta cu e no ta interesa mas pa deal cu nos y cu nos deal cu su abogado" e comunicado di e unitmanagers ta finalisa bisando.