Elmar: Fayo di coriente relaciona cu trabou di mantencion

ORANJESTAD - “Ta algun dia tras di otro cu nos tin mala suerte cu fayonan ta presenta un tras di otro, pero mayoria di nan ta for di nos mannan. Nos tecniconan a activa mesora pa trece solucion mesora. Tin biaha e ta bay facil y otro biaha e ta dura mas di locual nos a pronostica”, asina Wanda Broeksema, Gerente di e departamento di Relacion cu Cliente na N.V. ELMAR a duna di conoce. Diaranson y diahuebs anochi varios area den Oranjestad y Santa Cruz a keda sin coriente y tecniconan di N.V. ELMAR a traha duro te den oranan di marduga, pa por logra reestablece suministro normal atrobe. N.V. ELMAR tin algun siman caba haciendo mantencion riba algun instalacion di 12 mil volt y 60 mil volt den e stacionnan di Tanki Leendert y na Paardenbaai. E mantencion aki ta wordo haci door di e compania di Hulanda ABB. Pa por haci mantencion mester kita e “load” riba e kabelnan di 12 mil volt cu ta conecta ariba e stacion cu ta haciendo mantencion y pasa esakinan riba otro kabelnan di 12 mil volt. Normalmente e red ta carga cu 60% di e load pero ora cu saca un ekipo for di servicio ta pone extra carga riba otro kabelnan. Esey a pasa e anochi ey ora algun kabelnan di 12 mil volt a “raak defect”. Ta e momento ey a haya yamada y a core sali di biaha pa mira kico a pasa y analisa e fayo. Ora cu a purba di reconecta coriente, a afecta un otro kabel, pero esey tambe a keda resolvi basta lihe. Mientras tabata cabando, a haya informacion cu un fuse mayor riba un palo di luz den area di Matividiri a daña. Pero esey si a tarda basta, pasobra mester a saca hende pa bay habri magazijn, saca material y bin cu ekipo aereo (bucket truck). Esaki a ocasiona cu a dura te mainta pa por a pone coriente bek na Matividiri. Tin biaha e trabounan pa drecha un fayo ta bay facil, pero tin biaha e fayonan por ta asina compleho cu e ta tuma mas empleado, mas experticio y mas material prome cu por keda cla. Wanda Broeksema ta pidi disculpa pa cualkier inconveniencia debi na e fayonan cu tabatin dialuna. Nan tabata fuera di alcance di N.V. ELMAR y ta compronde cu clientenan ta frustra. E ta fastioso pasobra clientenan a keda varios ora sin coriente. Pero tin cu bisa cu ora coriente bay e momento ey, ta e ora ey e tecniconan ta sali pa investiga, haci un inventarisacion di material cu nan tin mester y kico nan tin cu haci y no tur ora tin informacion e momento ey pa duna. Hopi biaha ta dificil pa sali di biaha cu informacion pasobra mester verifica debidamente pa evita cu ta suministra informacion incorecto." Nos compania nacional di distribucion di coriente ta consciente cu pa e cliente e asunto por ta frustrante pasobra nan kier sa e ora ey kico ta pasando, cu si e coriente bay por ehempel 1:00am cu nan kier sa un minuut despues kico a pasa. Pero esey no ta posibel como cu e tecniconan mes tin biaha e ora ey no sa di e fayo." Awendia tin aparatonan moderno cu por determina unda e storingnan ta y determina e areanan cu ta afecta, pero pa sa exactamente e motibo di e storing semper lo dura un par di ora of un dia despues. Mayoria storing di ultimo temponan aki tin nan origen den daño haci na kabelnan bou tera den pasado cu nunca por a wordo detecta te ora e kabel faya. Ta bon pa enfatisa cu semper tecniconan ta sali mesora ora di un fayo y ta purba keda cla mas lihe posibel pasobra e ta na interes di N.V. ELMAR y e clientenan tambe.