E.P.I : Impasse lo no stroba apertura aña escolar

ORANJESTAD - Mientras cu unitmanagers di EPI a sigura cu nan accion lo continua y stroba apertura di e aña escolar 2016/2017, e directiva a bisa diahuebs atardi laat cu Colegio EPI lo habri otro siman normalmente pues pa e studiante y mayornan lo no bin cambio. Cu si e Unit Managernan ta na pia di trabou of no, scol lo habri y opera normal segun Ankie Danker, director di "Bedrijfsvoering" na Colegio EPI. Pues tin un impasse serio entre e dos gruponan aki, un siman prome cu scol habri. Segun Danker a bisa NoticiaCla.com, dia 18 di augustus ta warda studiantenan na scol y prome dia di scol ta 22 di augustus. E unitmanagers ta pensa otro. 

ACCION DI MAESTRONAN

E unitmanagers, sosteni pa e sindicato di maestro SIMAR, a mustra cu nan lo no entrega nan planning di scol y ningun otro cos cu ta wordo rekeri di nan. Esaki pasobra si nan mester haci esey, e ta permiti scol su apertura. Y ta net esey e unitmanagers no kier, pa por haya atencion pa nan problemanan, cu segun e unitmanagers, ta hopi. Entre e problemanan, ta e taak verdeling, cu segun nan, no ta cuadra y no ta husto. Salario tambe ta un problema. Y tanten cu nan no haya oido y claridad pa e diferencianan di opinion, nan lo no coopera pa scol habri otro siman. , 

DIRECTIVA

Directiva mientrastanto a mustra cu nan a keda sorprendi pasobra diahuebs mainta e directiva di EPI a haya notificacion cu e "Unit Managernan" a bay atende un reunion na nan sindicato, SIMAR, pero ta via prensa despues a tende cu nan lo kier welga pa forsa Gobierno regla e aumento di salario di 25% cu nan a solicita. 

PRESENTA NA TRABOU

Manera ta custumber, diahuebs e docentenan mester a presenta na pia di trabou, 5 dia prome cu scol cuminsa, pero a manda informa cu nan ta den reunion cu SIMAR, pues no a presenta. Como cu oficialmente no a tende di nan, e directiva di Colegio EPI ta confundi, riba e motibo di nan welga, pa cuanto dia y asina por menciona.

DANKER

"Mi ta haya hopi jammer cu nan no a informa nos, no a sinta na mesa cu nos pa bisa nos cu esaki ta nos ponencia, esaki nos ta bay haci pasobra con cu bay bin, no ta nan so ta responsabel pa un organisacion asina grandi", di acuerdo cu e director di scol. Colegio EPI ta conta cu mas di 1900 studiante y mas o menos 200 docente, pues ta un di e scolnan di mas grandi riba nos isla. 

CONCIENTE DI MALCONTENTO

Scol ta consciente cu ta reina malcontento bou di e Unit Managernan, pero a nota cu tin intercambio di carta entre Minister, sindicato y nan abogado. "Pero pa tuma un decision asina drastico di bay welga y pa nos wordo informa via prensa, pa nos ta un tiki fastioso", asina Danker a bisa cu un bos firme.