Polis a detene sospechoso den caso di droga

ORANJESTAD - Diaranson anochi polis a logra haci un detencion importante den un investigacion largo cu a inicia desde November 2013. Recherchenan di e “Projekt Team Narcotica” hunto cu Recherchenan di e departamento di “Unit Georganiseerde Criminaliteit” a detene e sospechoso A.O.S. miho conoci como “Cache”, kende ta naci na Republica Dominicana di 50 aña di edad y cu ta biba na Hooiberg. E homber aki ta conoci pa husticia caba. Den cuadro di e investigacion andando, asina cu Polisnan a detene e sospechoso, Fiscal a compaña recherchenan pa haci un “huiszoeking” na e cas situa na Hooiberg. Pa facilita e proceso di investigacion y pa logra yega na mas prueba posibel, a haci uzo di cachonan di e ekipo di K-9 di Polis. Den camber di e sospechoso, Polisnan a bin topa cu diferente atributo cu ta uza pa prepara droga, specialmente cocaina. Fiscal a dicidi di encarcela e sospechoso mientras cu e investigacion ta continua.