Van der Velden y Visser a experiencia un dia complica den wega olimpico di Rio 2016

RIO DE JANEIRO - Diaranson merdia e competencia di Nacra 17 a inicia den e Weganan Olimpico na Rio de Janeiro, Brasil. E cas di e deporte di bela aki na Rio, esta Marina Da Gloria tabata yena cu fanaticada entrenan varios familiar di nos atletanan cu bini di Aruba specialmente pa e ocasion aki kendenan anciosamente tabata sinta ta warda e competencia di Nacra 17 cuminsa. Pa nos representantenan di Aruba, Nicole van der Velden y Thijs Visser hunto cu coach Pim Nieuwenhuizen e ora di berdad a yega mirando cu pa un aña nos atletanan ta biba y entrena na Rio pa e competencia mas grandi di nan carera mientras e dia mes a yega. Nos tin cu bisa cu e condicion di tempo no tabata esun mas faborabel e diaranson, e biento tabata fuerte y tabata cambia constantemente mientras e intensidad di e biento tabata subi y baha, riba dje e awacero tambe a yobe pa prome biaha desde cu e Weganan Olimpico a inicia. Pa alrededor di 1or di merdia ora di Rio, Nicole y Thijs a cuminsa na nan prestacion den e Weganan Olimpico. Pa dia Nicole y Thijs mester nabega 3 Race den e competencia di Nacra 17 unda na final lo saca e averahe di punto pa defini e posicion riba e ranking general. Un total di 20 pais so a clasifica pa e Weganan Olimpico di Rio entrenan e duo di Aruba, Nicole y Thijs.

Pa loke ta e competencia riba e prome dia nos por bisa cu e duo di Aruba conoci como Flying Arubies a confronta problema riba e prome dia cu e biento fuerte y e intensidad di esaki. E condicion di tempo simplemente no tabata faborabel pa nos competidornan kendenan asina mes a lucha y purba na duna lo maximo posibel. Den e prome race Nicole cu Thijs a sali bon y tabata den e top 10, pero despues a confronta cuminsa problema y ta cay for di esaki, asina mes nan ambos ta lucha unda a lo largo nan ta finalisa na di 15 lugar. E di dos heat cosnan ta bolter por completo den e bahia Marina Da Gloria unda e tempo ta sera y bira scur mientras e biento tabata fuerte. Aki e race a haya como cuater "restart". Den e di dos race Nicole y Thijs a sigui purba pero e manera nan mes a bisa cu esaki tabata un di e dianan mas complica cu nan a yega di experiencia. A lo largo nan a caba na di 18 luga mientras den e overall standing nan ta awo na di 19 luga.