Armando brug pa conecta 'pariba y pabou di brug'

ORANJESTAD - Despues di lunanan di preparacion, a cuminsa arma e brug moderno di green corridor. Algun siman caba trabounan di preparacion pa e parti iconico di e proyecto.Y diaranson mainta tabata asina leu cu e brug nobo cu ta bay conecta pariba y pabou di brug, cu un ‘vierbaansweg’ a cuminsa wordo arma. E ta un parti importante di e infrastructura di ‘Green Aruba’ y uno cu ta rekeri hopi trabou y man experto pa completa.

FUTURO DI E BRUG EXISTENTE

E brug existente, e brug bieu, cu a haci e trabou di conecta pariba y pabou di brug pa decadanan largo, no ta bay wordo desmantela of kibra. E brug existente ta bay forma parti di e infrastructura pa hende, un Linear Park, cu ta bay haci di e bisindario un luga caminda ciudadanonan por haci uzo di e facilidadnan pa ehercicio, en general movecion saludabel.

DETAYE DI PROME PARTI DI BRUG

E prome parti di e brug cu a keda instala tin un peso di aproximadamente 14 ton y a tuma algun ora pa por a wordo poni na su luga. Na final a invita Prome Minister Mike Eman pa yuda sigura e structura na su luga pa medio di ‘bolts’ gigantesco. E team amplio cu a completa e prome fase di arma e brug nobo di Pos Chikito tin un trabou grandi nan dilanti, pero ta mustra cu e experticio ta duna pa un proyecto keda completa segun tur exigencia y tambe den e tempo apropia.