Razzia na KIA a produci varios articulo ilegal

ORANJESTAD - Den un esfuerso pa sigura cu nada ilegal ta drenta y ta keda den prizon, e personal di Korrectie Instituut Aruba, KIA, a tene un razzia di sorpresa awe diaranson mainta. Un ekipo special a drenta controla den tur cel, buscando pa artefactonan ilegal, cu no por ta den cel di detenidonan.

BASTA ARTICULO

Sin kier elabora riba kico precies a topa cu ne, directiva di KIA ta enfatisa cu a haya basta articulo y a tuma tur den beslag. Bisando esey, e celnan awe ta liber di tur sorto di artefacto cu ta drenta e prizon di un forma ilegal.

TRAHANDO CU EMPLEADONAN

E directiva nobo di prizon, trahando masha estrecho cu e empleadonan, lo haci tur lo posibel pa hisa e medidanan di siguridad y control pa garantisa cu ta preveni mas entrada di articulo ilegal. Ta consciente cu tur parti di mundo articulonan ilegal ta logra drenta y penetra den prizon, pero ta keda na e personal hunto cu e partnernan di control y siguridad, pa preveni esaki sigui pasa.

RETO CU INFRASTRUCTURA

KIA ta confrontando hopi reto cu nan infrastructura, specialmente debi na nan locacion dilanti lama. E biento fuerte combina cu salpeter sin un mantencion continuo ta haci cu a yega momento pa haci un trabou di mantencion grandi. Tin un plan cla pa ehecuta den cual lo renoba y eventualmente amplia e facilidad, uzando miho tipo di material pa garantisa un edificio mas sigur y duradero.