Famia grandi di Kiwanis Aruba a uni man pa realisa e proyecto ‘Back 2 School’

ORANJESTAD – E famia grandi di Kiwanis Aruba a uni diasabra ultimo pa asina realisa e proyecto di mas grandi pa nos comunidad, esta e “Back 2 school”. E aña aki un total di 70 mucha menos afortuna na Aruba ta ricibi ayudo cu nan articulonan pa cuminsa un aña escolar nobo.  E proyecto aki ta sumamente importante, pasobra Kiwanis ta yuda e famianan den dificultad, aliviando e mayornan di e extra gastonan.  

Kiwanis tin como meta pa sirbi y contribui na e muchanan di nos comunidad.  E muchanan menos afortuna a ricibi un tas yena cu articulo di school, manera; pen, potlood, schrift, gum, lineal etc.  E proyecto aki a cubri tambe e uniform pa asina e muchanan bay scol, pero tambe nan jeans, keds, mea y paña intimo pa asina cuminsa nan aña bon prepara. 

Despues di haci nan compra cu e miembronan di Kiwanis e muchanan a bay Casibari caminda nan a disfruta di un dia yena cu wega y animacion di EZ party solutions.

E muchanan a keda hopi contento cu e paña, uniform y nan tas yena cu articulo pa asina cuminsa un aña escolar nobo. E dia tabata uno exitoso mirando e sonrisa na e cara di e muchanan. Kiwanis kier  gradici Geekay Department Store, Fruteria Virgilio, E-Z Party Solutions, Balashi y Office Systems pa contribui na e Proyecto. 

Kiwanis ta un organisacion global di boluntario dedica na cambia mundo via un mucha y via di un comunidad cada biaha y tin como lema: sirbiendo e muchanan di mundo. Kiwanis Club of Aruba ta activo den e comunidad Arubano desde 1964. Pa mas informacion di Kiwanis Club of Aruba y of su actividadnan por acudi na www.kiwansaruba.org of Facebook page Kiwanis Club of Aruba.  Tambe por bishita e website di Kiwanis International na www.kiwanis.org.