Mon Plaisir Basis ta celebra su 60 aña di existencia cu un Charity Ball

ORANJESTAD - Mon Plaisir Basis ta celebra su 60 aña di existencia cu un Charity Ball cu ta tuma luga dia 22 di october proximo riba speelplaats di e scol mes. Un comite di algun maestro, ex-alumno y mayor a keda forma cu, haciendo uzo di red carpet, un decoracion magistral y live music, lo percura pa un ambiente unico riba e speelplaats. Asina hopi ex-alumno, ex-maestro y maestro, lo pasa algun ora dushi e anochi aki na momento cu nan lo topa cu otro despues 10, 20, 30, ….of te hasta 60 aña sin mira of papia cu otro. Dushi no!!

E Charity Ball tin tambe como meta primordial recauda fondo pa inverti den material digital pa e scol, manera borchi digital, biblioteca digital, software educativo y mas.

Carchi pa e Gala Party aki ta na benta for di 22 di augustus benidero na Mon Plaisir Basis durante ora di scol, for di 7.30 a.m.te 2.00 p.m. y na tur Foodmart di Valero.

Si bo no kier perde e oportunidad aki, bo por reserva bo carchi di awo caba via email: monplaisirbasis@gmail.com na unda tambe por haya mas informacion like nos riba Facebook: Mon Plaisir Sparkling Jubilee. Y tambe join nos group page: 60 aña Mon Plaisir Basis, bo tabata t’ey?, pa disfruta caba di hopi potret, video etc. y comparti bo recuerdonan.